सरकारयात पार्टीया चाकःछि

थः हे अध्यक्ष जुयाः थम्हं हे प्रस्ताव यानाः थःनापं जानाः सर्वसम्मतं पारित जूगु वामदेव गौतमयात राष्ट्रियसभाय् यंकेगु खँयात थः प्रधानमन्त्री जुयाच्वंगु मन्त्रिपरिषदं नालेमखु धकाः केपी शर्मा ओली भाजुं धयादीगु खँ न्यनाः सकलें वाताहां जूगु दु। सवाल निघौया दुने पाःगु खः । वामदेव गौतमयात राष्ट्रियसभाय् यंकेगु खँया लिउने प्रचण्ड व माधव नेपाल नापं सम्मिलित जुयाः मेगु चाल म्हिताच्वंगु व व्यापारीतय्सं नं डा. युवराज खतिवडायात अर्थमन्त्रीं चीकेगु लागिं माधव, प्रचण्ड व वामदेवयात ल्हातय् काःगु खँ ओली भाजुया गुप्तचरतय्सं सुचं बियाः थ्व खँ चाः हिउगु खः । थ्वयां न्ह्यः प्रचण्डनाप जानाः वयाच्वंम्ह वामदेवयात थःगु ल्हातय् कायेत हे पार्टीया उपाध्यक्ष दयेकेगु ज्या याःगु खः । थुलि जक मखसें छुं ई न्ह्यः झापाय् वनाः सरकार क्वःथलेगु षडयन्त्र यायेगु कुतः जुयाच्वन धकाः धाःम्ह ओलीं प्रचण्डया ल्हातय् छ्वयेगु पलेसा प्रचण्डया मनू जुया जूम्ह वामदेवयात हे प्रधानमन्त्री दयेकाः थः उत्तराधिकार दयेकेगु कुतः याःगु नं खनेदयाच्वंगु खः ।

तत्कालीन एमाले व माओवादी दथुइ चुनावी गठबन्धन जूगु व वयांलिउ एकीकरण जूगुया लिउने ओलीं वामदेवयात हे विशेष जिम्मेवारी बियाः न्ह्याकूगु खः । नेपालय् घरेलु सहमतिया आधारय् संविधान जारी जुल, संविधान जारी जुइधुंकाः प्रचण्डया समर्थनया आधारय् ओली प्रधानमन्त्री जुल । भद्र सहमतिया आधारय् राष्ट्रपति जुइमाःम्ह सुशील कोइराला दक्षिणया इराशाकथं प्रधानमन्त्री पदय् दन । संविधानसभा हे त्वःताः बहिष्कार यानावंपिं राजेन्द्र महतोपिं नं दक्षिणया इशाराय् कोइरालायात भोट बीत संविधानसभाय् दुहां वन । अनंलि दक्षिणया हे दबावय् थःगु पार्टी दुने घेराबन्दीइ लाःम्ह प्रचण्डं थम्हं हे समर्थन यानाः दयेकाबिउगु ओली सरकार त्वःता कांग्रेसनाप जानाः अविश्वासया प्रस्ताव तल । थ्वयांलिउ ओलीं पदं राजिनामा बियाः थःपिंत दक्षिणं सिधयेकेफुगु ग्याःचिकुपहःया अभिव्यक्ति बिल । थःत तत्काल दक्षिणं पत्याः मयाइगु खनाः ओलीं वामदेवयात न्ह्यचिइकाः वयात हे प्रधानमन्त्री बीगु लोभ नं क्यनाः माओवादीयात कांग्रेसपाखें तछ्यानाः सहकार्यया लँय् हयेगु कुतः याकूगु खः ।

तर विकसित परिस्थितिइ ओलीं नं दक्षिणलिसेया थःगु पुलांगु स्वापूयात ताजगी यात व वामदेवयात प्रधानमन्त्री दयेका च्वनेम्वाःगु अवस्था पिदन । गुलिसिनं ला वामदेव व ओलीया दथुइ गुह्य सल्लाह जूकथं नैतिक रूपं वामदेवयात प्रधानमन्त्री दयेकेमाःगु अवस्था वयेफु धकाः हे ओलीं वामदेवयात बुका बिउगु नं धयाच्वंगु दु। वामदेवयात चुनावय् ओली पक्षीय कार्यकर्तातसें ग्वाहालि याना मबिउगु खँ नं पिहां वःगु खः ।

चुनावय् बुनाः घाःपाः जूम्ह धुँ व मेखे प्रधानमन्त्री जुइगु नुगलय् च्यानाच्वंगु हुतहुति मि ज्वनाः वामदेव न्ह्यात । अले निर्वाचित जूपिं निम्हतक सांसदयात राजीनामा बीकाः इमिगु निर्वाचन क्षेत्रं दनाः त्याकेगु कुतः यात । तर थ्व निगुलिं कुतः विफल जुल । धक्का नल ।

थ्व हे पृष्ठभूमिइ छखे चुनावय् बुनाः घाःपाः जूम्ह धुँ व मेखे प्रधानमन्त्री जुइगु नुगलय् च्यानाच्वंगु हुतहुति मि ज्वनाः वामदेव न्ह्यात । अले निर्वाचित जूपिं निम्हतक सांसदयात राजीनामा बीकाः इमिगु निर्वाचन क्षेत्रं दनाः त्याकेगु कुतः यात । तर थ्व निगुलिं कुतः विफल जुल । धक्का नल । घाःपाः जुयाः छुं मखंक सना जुइबलय् व नुगलय् मि च्याकाः छुं हे मस्वःसे ब्वाँय् वनेबलय् गुकथं ठक्कर नइगु खः उकथं नल । झी पुलांपिं मनूतय्सं धाइगु थेंज्याःगु खँ जुल । निथाय् ठक्कर नयाः होश चाःबलय् पोखराय् रविन्द्र अधिकारी सिनाः जुइत्यंगु उपनिर्वाचनय् एन्टि वेभ वइगु खनाः दनेगु आँट हे मंत । प्रतिनिधि सभाय् हे वनीम्ह धुँ मनू खः, राष्ट्रियसभाय् लुसुक्क दुहां वनीम्ह छुं थें मखु धयाजूम्ह वामदेवं प्रधानमन्त्री जुइगु निश्चित जूसा जक राष्ट्रियसभाय् वने धाल ।

वामदेवयात प्रधानमन्त्री दयेकेत संविधान संशोधन यायेत कार्यदल नं दयेकल । तर गोप्य याना तयेमाःगु थ्व निर्णय सार्वजनिक जुल । सार्वजनिक जुइवं व्यापक विरोध जुल । संविधान संशोधन यायेत दयेकूगु कार्यदल हे दुसुले माल, नेकपाया सचिवालयया मनूतसें हे छलफल जक जूगु खः निर्णय जूगु मदु धकाः दुसुलाः न्ववाना जुइमाल । थज्याःगु परिस्थितिइ संविधान संशोधनया निंतिं छुं यानाः न्ह्यायेगु ला सम्भव हे मजुल । थ्व हे इलय् नेकपा सचिवालयं प्रधानमन्त्री जुइगु खःसा हे जक राष्ट्रियसभाय् वने, मखुसा अन सांसद जुयाच्वनेत वनेमखु धयाच्वंम्ह वामदेव गथे माने जुयाः थ्व निर्णय यात ले धइगु न्ह्यसः सकभनं न्यन । सायद थ्व हे न्ह्यसः चाःहिलाः गुप्तचरया रिपोर्ट बालुवाटार थ्यंगु जुइमाः अले थुकी ओलीया नजरय् प्रचण्ड, माधव व वामदेव व्यापारी व शक्तिकेन्द्रया खेलय् सामेल जूगु घेराय् लात । नेकपाया स्वम्ह नेता ओलीया नजरया घेराय् जक लात तर ओलीं हे चाःकथं सरकार घेराबन्दीइ लात ।

थुगु इलय् ओलीं वइगु फागुन २० गते राष्ट्रियसभाया दुजः पदय् मदयेत्यंम्ह अर्थमन्त्री डा. युवराज खतिवडायात हे निरन्तरता बीगु खँ धासें वामदेवयात राष्ट्रियसभाय्रा ष्ट्रपतिपाखें मनोनीत यायेत मन्त्रिपरिषदं सिफारिस याये फइमखु धाये धुंकूगु दु। आः वामदेव नं राष्ट्रियसभाय् वनीगु व डा. युवराज खतिवडायात नं अर्थमन्त्री पदय्नि रन्तरता बीगु छु उपाय दु? खतुं सु नं मनूयात मन्त्री दयेके जिउ तर व मनू खुलाया दुने संसदया सदस्य जुइमाः धइगु प्रावधान खः । २०५१ सालय् एमालेया अत्पमत सरकारं मन्त्री दयेकूपिंत खुलाया दुने राष्ट्रियसभाय् यंकेफुगु अवस्था मदुबलय् राजीनामा बीकाः हाकनं नियुक्ति बिउगु खः । आः थ्व नं छगू उपाय खः ।

तर तत्काल उत्पन्न समस्या ज्यंकेगु तःधंगु खँ मखु, तर सचिवालय दुने अल्पमतय् लानाः पार्टीपाखें घेराबन्दीइ लाःगु सरकारं गुकथं थुकियापाखें मुक्त जुइगु खः? ओलीया निंतिं कि त परे जूगु बेहोरे याना वनेगु वा बहुमतनाप सम्झौता याना वनेगु जक लँपु दु। तर ओली न्ह्यागु हे लँपुइ वंसां बहुमत दुपिंसं ओलीयात प्रधानमन्त्री पदय् तया तइला? थ्व नं न्ह्यसः वःगु दु। प्रधानमन्त्री पदया निर्धारण ला प्रतिनिधिसभाय् त्याना वःपिं दुजःत गुखेपाखे दु धइगु खं निर्धारण जुइगु खः । पूर्व एमाले व पूर्व माओवादी जुयाः त्याना वःपिं आः नेकपाया सांसदतय्गु बहुमत ला आः नं ओलीया पाखे हे दु। तर थुकी फेरबदल जुइमखु धकाः धाये फइमखु ।