चुनाव धुंकाः पाक छु मोडलय् वनीगु खः ?

श्रावण ९ गते बुधवाःया दिनय् पाकिस्तानय् आम चुनावयात सफल यायेगु अर्थात शान्तिपूर्वक ढंगं चुनावयात व्यवस्थित यायेगु धकाः३ लाख ७० हजार सुरक्षाकर्मी परिचालन यायेगु ज्या यात । आम चुनाव अर्थात नेशनल एसेम्बलीइ २७२ सिट दुसा प्रान्तीय सभाय् ५७० सिट दु । चुनवाय् ब्वति कयाच्वंपिं पार्टीत यक्व दु, तर विशेष यानाः स्वंगू पार्टी सत्ता संचालन यायेगु धेंधेंबल्ला जूगु खः ।

छगू नवाज सरिफया पार्टी मुस्लिम लिग । मुस्लिम लिगया अप्वः प्रभाव दुगु राज्य पंजाब खः, थन उद्योगपति व व्यापारीतय्गु व्यापाक समर्थन मुस्लिम लिगयात दु । मेगु पार्टी भुट्टोया पार्टी खः । थौंकन्हय् भुट्टोया पाक पिपुल्स पार्टीयात हाँके यानाच्वंम्ह बेनजिर भुट्टोया काय विलवाल भुट्टो खः ।

थ्व पार्टी पाकिस्तानया गांगामय् लोकंह्वाः । विशेष यानाः सिन्धु पा्रन्तय् पिपिपि पार्टीया प्रभाव दु । मेगु पार्टी खः– क्रिकेटर इमरान खानया तेहरिक ए इन्साफ (पिटीआइ) पार्टी । थ्व पार्टीया प्रभाव नवाज सरिफ व भुट्टोया पार्टीइ थें देन्यंकं मदुसा सेनाया आशिर्वाद दयाच्वंगु दु । सेनाया समर्थन दुगुलिं हे इमरानया पिर्टीआई नं बहुमत हयेफइगु विश्वास यानातःगु खः ।

अले गथे अनुमान यानातःगु खः, अथेहे पिटीआई नं थुगु चुनावय् विजय चूलाकूगु दुसा थुकिया नेता इमरान खान प्रधानमन्त्री जुइगु जूगु दु । इमरानया पार्टीं बहुमत हयेफु धयागु अनुमान छाय् जुयाच्वंगु धाःसां पाकिस्तानय् धाँधलीरहित चुनाव जुइ धकाः कम जक विश्वास यानातःगु दु ।

थौंकन्हय् प्रजातन्त्रया मसिहा धयातःगु देश अमेरिका व भारतय् ला धाँधली जुइफु धाःसा पाकिस्तान ला अर्ध प्रजातान्त्रिक देय् खः । थन सेना अति शक्तिशाली । सेनाया कारणं हे थन पिटीआई त्याइगु अनुमान जुयाच्वंगु खः । सेनां छु चाहे जुल, अथे जुइ धयागु जनताया विश्वास दु । अथे खःसां पाकिस्तानी जनतां उत्साहित जुयाः मतदानय् ब्वति काल ।

आः छुं भचा पाकिस्तानया राजनीतिक घटनाक्रमया बारे न्ह्यथने । सन् १९४७ य् पाकिस्तान नं छगू बिस्कं मुस्लिम देय् कथं घोषणा जूगु खः । भारत बहुसंख्यक हिन्दू जातिया मुलुक खःसां अल्पसंख्यक व मेमेगु जातिया साथ कयाः प्रजातन्त्रया लँपु ज्वनाः विकास पाखे न्ह्याः वन । पाकिस्तान धाःसा अप्वः सैनिक शासन जुयाच्वनीगुलिं पुरा प्रजातान्त्रिक ढंगं न्ह्याः वने मफयाच्वंगु देय् खः ।

पाकिस्तानया इतिहासं क्यनाच्वंगु दु गबलें सैनिकतय्गु ल्हातय्, गबलें नागरिक पार्टीया ल्हातय् शक्ति लानाच्वंगु दु । अथेहे आःतकया इतिहासं नागरिक पार्टीं चुनाव त्याकूसां पूवंक सत्ता थःगु ल्हायेत कायेफुगु मदु । पाकिस्तानय् नागरिक पार्टीया छगू कमजोर थ्व हे खः । भारतय् थें नेतृत्व क्षमता विकास जुइ मफयाच्वंगु दु ।

पाकिस्तानय् नेतृत्व क्षमता विकास मजुयाच्वंगुलिं यानाः नागरिक समाजया ल्हातय् सत्ता वंसां नं अप्वः भ्रष्टाचार जुयाच्वनीगुलिं यानाः जनता निराश जुइत बाध्य जुयाच्वंगु दु । पाकिस्तानय् जनप्रतिनिधि शासक धकाः अप्वm कि नवाज सरिफया पार्टी सत्ताय् थ्यनीगु खःसा कि भुट्टोया पार्टीय सत्ताय् थ्यनाच्वनीगु खः ।

तर नागरिक पार्टी धाःगु थ्व निगू पार्टीं सत्ता चले याइबलय् हे अप्वः जनता असन्तुष्ट जुयाच्वनी । उकिया कारण धयागु भ्रष्टाचार हे खः । भ्रष्टाचारं यानाः देय्या अर्थतन्त्र कमजोर जुया वनाच्वंगु दुसा थुपिं पार्टीइ परिवारवाद हावी जुया वनाच्वंगु दु । गुकिं यानाः जनता दिक्क जुयाच्वंगु दु । जब जनता यक्व हे दिक्क जुइ, अले सैनिक शासकतय्त लुमंकेगु ज्या याइ ।

जनतां थथे धायेगु सुरु यदि भ्रष्ट नेतातय्सं शासन यानां तुं च्वन धाःसा पाकिस्तान कमजोर जुजुं कुचा कुचा जुया वनेफु ।अविकसित देशय् जक मखु, विकसित देशय् नं नेतृत्वया क्षमता विकास मजुया नेतागिरिया राजनीतिक विकास जुया वनाच्वंगु खनेदु । जब नेतागिरीया विकास जुयावन,ि व देशया अवस्था स्यनावनी ।

नेतागिरी राजनीतिया छगू रणनीति कथं थः विरोधी नेतातय्त माइनस यायेगु निंतिं षडयन्त्र यानाच्वनी । थौंकन्हय् यक्व देशय् थज्याःगु घृणित खेल जुयाच्वंगु दु । विरोधीतय्त माइनस यायेगु छगू मुख्य हतियार खः छगू न छगू मुद्दाय् फँसे यानाः वया राजनीति हे ध्वस्त यानाबीगु । पाकिस्तानया मामिलाय् अथेहे जुयाच्वंगु खनेदु ।

उच्च अदालतया न्यायाधीश सौकात अजिज शरिफयात चुनावया इलय् छुट बीमाः धकाः जोड याःगु खः । तर गुप्तचर संस्थां शरिफयात छुट बी मजिउ धकाः हस्तक्षेप याःगु कारणं सरिफ जेलय् वनेमाल । सरिफया पार्टीं सेना व गुप्चर संस्थायात शंकाया दृष्टिं स्वयेगु यानाच्वंगु कारणं यानाः सेना शरिफया पार्टी खनाः मि जुयाच्वंगु खः । चुनावया सर्वेक्षणं शरिफया पार्टी त्याइगु क्यनाच्वंगु खः ।

तर सेना शरिफया पार्टी खनाः तम्वयाच्वंगु कारणं यानाः यदि शरिफया पार्टी त्यात धाःसा पाकिस्तानय् झन गञ्जागोल जुइगु अनुमान यानातःगु खः । आः सेनाया समर्थन दुम्ह इमरान खानया पार्टी त्याःगु दु । उकिं आः सेना खने दयेक सक्रिय मजुइफु धाःगु दु । इरामन चुनाव अभियानया इलय् सेनाया हे भाय् ल्हानाः शरिफयात भारतीय दलाल धाःगु खः ।

नवाज सरिफ त्यात धाःसा गथे नेपाः, भुटान, श्रीलंकाय् भारतं अस्थिर यानाः लबः कयाच्वंगु खः, अथेहे पाकिस्तानय् नं अस्थिर यानाः भारतं फाइदा काइगु खँ इमरानं धाःगु खः ।