फागुन १४ व १५ गति इतिल्हने सम्यक

यल – प्रत्येक न्यादँय् छक्वः न्यायेकीगु इतिल्हने सम्यकया निंतिं तयारी शुरु जूगु दु । थुगुसी थ्व हे वइगु चिल्लाथ्व तृतिया व चौथि–फागुन १४ व १५) बुद्धवाः व विहीवाः निन्हुयंकं इतिल्हने सम्यक न्यायेकीगु जूगु दु ।इतिल्हने सम्यकया तयारी बारे जानकारी बीगु ल्याखं ग्वसाः ग्वःगु पत्रकार सम्मेलनय् न्हापांगु न्हिकुन्हु यलन्यंकंया दक्वं बहाः, बही, महाविहारय् च्वंपिं दिपंकर तथागत बुद्धया मूर्तियात थीथी सांस्कृतिक बाजंसहित नगर परिक्रमा यानाः नागबहालय् बिज्याकी ।

दिपंकर पर्वया नामं नं म्हसिउगु थ्व सम्यक थनया नांजाःगु हिरण्यवर्ण महाविहारया ग्वसालय् जुइ । नागबहालय् द्यः बिज्याके धुंकाः चान्हसिया १२ ताःइलंनिसें हे पुजा, महादिप प्रज्वलन, महायज्ञ, दशपारमिता व स्थविर (आजु)पिंपाखें परिक्रमा व महादान ज्याझ्वः न्ह्याइगु पत्रकार सम्मेलनय् जानकारी बिउगु दु ।

शुद्ध मनं, निःस्वार्थ भावं दान यानाः बोधिसत्व मार्ग प्राप्त यायेगुयात हे सम्यक दानकथं कयातःगु दु । दानया संस्कृतिकथं थुगु पर्वय् दिपंकर, अवलोकितेश्वर, बसुन्धरादेवी, आर्यतारा लगायतया देवदेवीया पुजा यानाः दान बीगु याइ । थनिं ७०० दँ न्ह्यवंनिसें वि.सं. १८६१ तक दँय्दसं न्ह्यानाच्वंगु थ्व सम्यक पर्व अनं लिपा धाःसा आयस्ता मगाःगु धासें न्यादँय् छक्वः न्यायेकेगु याना वयाच्वंगु खः ।

थुगुसी जुइत्यंगु थ्व सम्यक पर्व ४७२ क्वःगु खः ।नेपाल भ्रमण वर्ष–२०२० या हे झ्वलय् लाः वःगु थ्व परम्परागत पर्वया प्रचार यायेगु छगू अवसर जक मखसे आन्तरिक व वाह्य पर्यटकया ल्याः अप्वयेकेगु नं अवसर जूगु विश्वास ग्वसाः खलकं याःगु दु ।