ने. सं. ११४४ कौलाथ्व पारू - नःलास्वनेगु

हिन्दू राष्ट्रय् जनमत संग्रह यायेगु दलतय् बिचाः !

येँ (नेपालभाषा टाइम्स)- हिन्दू कट्टरपन्थतय्सं थौंकन्हय् नेपाःया थीथी थासय् न्ह्याकाच्वंगु हिन्दू राष्ट्र व राजतन्त्रया आन्दोलनयात शान्त यायेत राजनीतिक दलतय्सं जनमत संग्रहया प्रस्तावयात स्वीकार यायेफुगु आशंका याना हःगु दु ।

छखे राप्रपा व मेखे दुर्गा प्रसाईंया आन्दोलनपाखें प्रभावित जुयाः नेपाली कांग्रेस, एमाले आदि पार्टीया गुलिखे कार्यकर्तातय्सं थःगु पार्टी दुने नं हिन्दू राष्ट्र व राजतन्त्रया मुद्दायात सम्बोधन याये माल धकाः दबाब बीगु शुरु याना हःगु खँ सीदुगु दु ।

थ्व झ्वलय् राजनीतिक दलतय्सं आः राजतन्त्र पुनस्र्थापनाया मुद्दायात त्वःताः हिन्दू राष्ट्रया मुद्दायात सम्बोधन यायेत स्वयाच्वंगु अनुमान याना हःगु दु । राजतन्त्र मखु बरु हिन्दू राष्ट्रया सवालय् जनमत संग्रह यायेगु धकाः प्रस्ताव न्ह्यःने हयेगुबारे दलतय्सं बिचाः यानाच्वंगु खँ नं धाःगु दु ।

थुकियात संकेत यासें राप्रपाया सह अध्यक्ष रविन्द्र मिश्रं म्हिगः सामाजिक सञ्जालय् ‘राजतन्त्र मदुगु हिन्दू राष्ट्र स्वीकार्य जुइ मखु’ धकाः सन्देश जारी यानादीगु दु । राजतन्त्र मदुगु हिन्दू राष्ट्र धइगु ‘मियो बिनाको दाइँ’ जुइ धासें वय्कलं राजतन्त्रयात त्वःताः हिन्दू राष्ट्रयात जक स्वीकार यायेगु खँ वल धाःसा उकियात सुनानं स्वीकार याये मते धकाः अपिल समेत यानादीगु दु ।

वय्कलं थःगु सन्देशय् तःधंगु दलत आः हिन्दू राष्ट्र बीत तयार जूगु संकेत खने दयाच्वन धासें थ्व हिन्दू राष्ट्र राजतन्त्र सहितया जुइमाः, ‘गणतान्त्रिक हिन्दू राष्ट्र’ स्वीकार याये फइ मखु धकाः स्पष्ट यानादीगु दु । थ्वहे इलय् मेखे भारतीय सञ्चार माध्यमतय्सं नं नेपालय् हिन्दू राष्ट्र व राजतन्त्रया माग यासें आन्दोलन तच्वया वनाच्वंगु दु धकाः विशेष महत्व बियाः समाचार बीगु याना हःगु दु ।

भारतय् सन् २०२४ य् जुइगु संसदीय चुनावय् सत्तारुढ दल भाजपां हिन्दुत्वया नारायात अझ हे कडा रुपं ल्ह्वनेगु तयारी यानाच्वंगु दु । उकिया लागिं भाजपां नेपाःयात समेत हिन्दू राष्ट्र दयेकाः भारतय् थःगु प्रभुत्व क्यनेत स्वयाच्वंगु विश्लेषण याना हःगु दु । उकिं थन जुयाच्वंगु हिन्दू राष्ट्रया आन्दोलनय् भारतीय संघ संस्थातय्सं नं ब्वति कायेगु यानाच्वंगु दु ।

होशियार, चीन नं न्ह्यःने वनेफु !
थ्वहे झ्वलय् पुलांम्ह प्रधानमन्त्री लिसें नसपाया अध्यक्ष डा. बाबुराम भट्टराईं छगू ट्विट यासें नेपाःया धर्म निरपेक्षता र गणतान्त्रिक व्यवस्थायात खलल जुइ कथं भारतपाखें छुं नं कथंया गतिविधि मयायेत ख्याच्वः बियादीगु दु । नेपालय् धार्मिक कट्टरपन्थ ब्वलंकाः देय्यात अस्थिर यायेत स्वत धाःसा खुल्ला सिमानाया कारणं भारतयात समेत उकिं प्रभावित याइगु खँय् भारत सचेत जुइमाःगु खँ नं वय्कलं धयादीगु दु । यदि नेपाः हानं द्वन्द्वग्रस्त जुयाः अस्थिर जू वन धाःसा थुकिं विश्व महाशक्ति जुइत स्वयाच्वंम्ह चीनयात समेत हिमालवारी साला हयाः भारतया सुरक्षा चिउतायात झन् खतराय् लाका बी फइगु ख्याच्वः नं वय्कलं बियादीगु दु ।
माओवादीं न्ह्याकूगु जनयुद्ध नेपाली जनतां हे सञ्चालन याःगु जुयाः उकिया समाधान नं नेपाली जनतां हे यायेफुगु खँ न्ह्यथँसें वय्कलं धयादीगु दु, ‘आः बाह्य शक्तिया लिधंसाय् धार्मिक कट्टरपन्थ व राजतन्त्र म्वाकेगु मुद्दा ल्ह्वना हल धाःसा उकिं ब्वलंकीगु अस्थिरतायात नेपालं पने फइ मखु ।’ थ्व धार्मिक कट्टरपन्थ व राजतन्त्र म्वाकेगु षडयन्त्रयात ग्वाकेगु ज्या यात धाःसा उकिया मि भारतन्यंकं च्याये फइगु ख्याच्वः बिसें वय्कलं भारतं ‘आ बयल मुझे मार’ धइथेंज्याःगु आत्मघाती हर्कत भारतीय सत्तापक्षपाखें मजुइमा धकाः नं स्पष्ट भासं धयादीगु दु ।
थौंकन्हय् भारतया हे ग्वाहालिं नेपालय् हिन्दू राष्ट्र व राजतन्त्रया मुद्दा ल्ह्वना हयाच्वंगु खँयात इंगित यासें डा. भट्टराईं थ्व ख्याच्वः बियादीगु खः ।