परियत्तिइ ताःलाःपिंत सिरपाः लःल्हात

ख्वप (नेपालभाषा टाइम्स)- मैत्रेय युवा संघया ग्वसालय् बुद्ध संवत् २५६५ दँया परियत्ति परीक्षाय् उत्तीर्ण परियत्ति विद्यार्थीतय्त सिरपाः लःल्हाःगु दु । अखिल नेपाल भिक्षु महासंघपाखें संचालन जूगु बौद्ध परियत्ति शिक्षा अन्तर्गत बु.सं. २५६५ दँया परीक्षाय् उत्तीर्ण विद्यार्थीयात सिरपाः व दसिपौ लःल्हाःगु खः ।

जयकीर्ति महाविहार थथुबहिलिइ संघया अध्यक्ष लक्ष्मीचन्द्र वज्राचार्यया सभापतित्वय् जूगु ज्याझ्वलय् मूपाहांकथं भिक्षु संघरक्षित महास्थविर बिज्याःगु खः । मूपाहां भिक्षु संघरक्षित महास्थविरपाखें पंचशील बियाबिज्यासे शुरु जूगु ज्याझ्वलय् संघया सचिव संचित बुद्धाचार्यं लसकुस यानादीगु खः ।

ज्याझ्वलय् परियत्ति विद्यार्थी कृशा भैल, अभिभावक सुलोचना जोन्छे व परियत्ति शिक्षिक रञ्जु तामाङं परियत्ति शिक्षाया महत्वयात कयाः नुगःखँ तयादीगु खः ।
परियत्ति उत्तीर्ण विद्यार्थीयात मूपाहां भिक्षु संघरक्षितं दसिपौ व सिरपाः लःल्हानादीगु खःसा मैत्रेय परियत्तिया अक्षय कोषया दाता संघरत्न शाक्यं परीक्षाय् न्हाप व विशिष्ट श्रेणाीइ उत्तीर्ण २७ म्ह विद्यार्थीपिंनापं शिक्षिक शिक्षिकापिं संचित बुद्धाचार्य , प्रमिला धुख्वा , मेघना श्रेष्ठ व रन्जु तामाङयात नगद सिरपाः नं लल्हानाबिज्याःगु खः ।

मूपाहां भिक्षु संघरक्षितं शीलया महत्वयात कनाबिज्यासें छगू जक शील त्वाःदल धाःसा मेमेगु शील नं कमजोर जुया वनी धयाबियात । परियत्ति केन्द्रया केन्द्राध्यक्ष तीर्थराज वज्राचार्यं परियत्ति विद्यार्थीतय् निंतिं व्यक्तित्व विकासलिसें निबन्ध, न्ह्यसः लिसः कासा, वक्तृत्व कला, उद्घोषण, किपा च्वज्याया तालिम बीगु नापं कासा नं याना वयाच्वनागु जानकारी बियादिल ।

दाता शाक्यं नं नुगःखँ तयादीगु ज्याझ्वलय् संघया दुजः माइला दोङ्गं सुभाय् देछानादीगु खः ।

सम्बन्धित बुखँ

LEAVE YOUR COMMENTS