ने. सं. ११४३ तछलाथ्व द्वादशी -

विराटं कवि पूर्ण वैद्य लुमंकल

ख्वप- विराट नेपालभाषा साहित्य सम्मेलन गुथिं मदुम्ह कवि पूर्ण वैद्यया लमुन्तिइ छगू विचाः मुँज्या याःगु दु । गुथिं थः पुलांम्ह नायःलिसें सल्लाहकार मदुम्ह कवि वैद्यया लुमन्तिइ उगु विचाः मुँज्या याःगु खः ।

विराटया नायः महेन्द्रगोपाल कर्माचार्यया सभापतित्वय् जूगु ज्याझ्वलय् विराटया संस्थापक लिसें सल्लाहकार साहित्यकार डा. योगेन्द्र प्रधानं मदुम्ह कवि वैद्य नेपालभाषा ख्यलय् छम्ह ज्वःमद्ुम्ह व्यक्तित्व जूगु खँ कनादिल । वय्कलं कवि वैद्यं राजकीय मान्यता चूलाके मफुगु खँ न्ह्यथनादिसें वय्कःया स्तरया साहित्य यदि खस् नेपाली वा अंगे्रजी भासं पिहां वःगु खःसा साहित्यय् नोबेल सिरपाःया निंतिं नं दावी याये फइगु खँ कनादिल ।

ज्याझ्वलय् साहित्यकारपिं नरेन्द्रभक्त हाडा, गोविन्दमान श्रेष्ठ, त्रिरत्न शाक्य, प्रदीपरत्न शाक्य, पशुपतिमान पःमां, शौरभ शाक्य, दुर्गामोहन श्रेष्ठ, विमल ताम्राकार लगायतं मदुम्ह कवि वैद्यःया व्यक्तित्व व कृतित्वया थीथी पक्षयात कयाः नुगःखँ तयादीगु खः ।

नेपालभाषा आधुनिक काब्य विधाया न्ह्युलवा कवि वैद्य वंगु गुंलागा चौथिकुन्हु ८१ दँया उमेरय् दिवंगत जुयादीगु खः । कब्जियत जुयाः निदान अस्पतालय् भर्ना जुयादीम्ह वय्कः वासः याकु याकुं मदुगु खः । वय्कःयात नेपालभाषा काब्य ख्यलय् आधुनिक कविता शुरु याःम्ह न्ह्यलुवा कवि कथं काये याः ।

वय्कःया ‘लःलःखः’ कविता मुना नेपालभाषा साहित्य ख्यलय् जक मखु खय् भाय्या साहित्य ख्यलय् तकं अतिकं चर्चित कृति खःसा थुगु कृति ‘ड्रप अफ वाटर’या नामं अंग्रेजी अनुवाद जुयाः नं पिहां वयेधुंकूगु दु ।