कोरोनोभाइरसय् उदासिन सरकार

चीनया छगू नगर वुहानं शुरु जूगु नोबेल कोरोना भाइरसया विश्वया थीथी देशय् न्यना वनेगु क्रम अप्वया वनाच्वंगु दु। थ्वहे झ्वलय् चीन नेपाः लिहां वःपिं निम्ह विद्यार्थीयात येँया शुक्रराज ट्रपिकल अस्पतालया आइसोलेसन वार्डय् तयाः उमिगु निगरानी याःगु खःसा उमिके भाइरस मदुगु खँ सीदयेवं अस्पतालं उमित डिस्चार्ज यायेधुंकूगु दु ।

तर चीनया वुहानय् आपालं नेपाःमि विद्यार्थी मेडिकल शिक्षा अध्ययन यायेत च्वनाच्वंगु दु। वुहानय् कोरोना भाइरस महामारी कथं न्यनावनेगु क्रम अप्वया वनाः अन संक्रमणया ल्याः नीप्यद्वः स्वयां अप्वः थ्यनेधुंकूगु दुसा सीपिनिगु ल्याः ४९० स्वयां अप्वः थ्यने धुंकूगु दु। चीनय् संक्रमण अप्वया वनेवं अन ब्वनाच्वंपिं नेपाःमि विद्यार्थीपिंसं थःपिंत सरकारं उद्धार यायेमाःगु माग याना वयाच्वंगु दु। वंगु स्ववाः न्ह्यः हे चीनय् संक्रमण अप्वया वंगु खःसां नं नेपाःमि विद्यार्थीयात उद्धार यानाः नेपाः हयेगु खँय् धाःसा आः तक नं सरकार अलमल जुयाच्वंगु दु ।

नेपाःमि विद्यार्थीपिंसं थःपिंत उद्धार यायेमाल धकाः माग यानाच्वंगु छखे दुसा मेखे सरकारं अनं उद्धार यानाः हइपिं विद्यार्थीयात तयेगु निंतिं थाय् तकं माले मफुगु धाःसा बिडम्बनाया विषय खः । सरकारं नेपाःमि विद्यार्थीया माग कथं उद्धार यायेगु धाःसां नं सरकारं निर्णय याःगु छवाः तक थाय् तकं माले मफुगु धइगु सरकार विश्वन्यंकं न्यना वनाच्वंगु ल्वय् प्रति गुलि तक सचेत धइगु न्ह्यसः नं थन ब्वलनाच्वंगु ।

चीनय् अध्ययन यानाच्वंपिं नेपाःमि विद्यार्थीयात नेपाः हयेगु खःसा उमित निवाः तक आइसोलेसन सेन्टरय् तयाः निगरानी यायेमाःगु मान्यता दु। कोरोनाया संक्रमण निन्हु निसें झिंप्यन्हु तक खनेदइगु जूगुलिं उमित निवाः तक निगरानी तयेमाःगु खः । तर उकियात माःगु थाय्या बारे तकं सरकारं निर्णय यायेमफयाच्वंगु सरकार थ्व संक्रमण प्रति संवेदनशील मदु धकाः स्पष्ट यानाबीगु दु। विश्व स्वास्थ्य संगठनं चीन कोरोना भाइरसया उच्च जोखिमय् दुगु व थुकिं नेपाःयात नं लिच्वः लाकेफइगु खँ धायेधुंकूगु दु। लिसे विश्व स्वास्थ्य संगठनं कोरोना भाइरसया प्रभावितयात निवाः तक अनिवार्य रुपं निगरानी तयेमाः धकाः धयाच्वंगु दु ।

थौं तक नेपालय् भाइरसया विरामी लूगु मदुनि । तर आः गुलिं नं आइसोलेसनय् तयाः जाँच यायेमाःपिं विरामीयात स्वतन्त्र त्वःतूगु दु। थुकिं भविष्य नेपाःयात लिच्वः मलाकी धकाः धायेफइगु अवस्था मदु ।

मेखे सरकारं चीनय् च्वंपिं नेपाःमि विद्यार्थीया बारे उलि संवेदनशील मजूगु द्वपं स्वास्थ्य क्षेत्रया हे विज्ञपिंसं बियाच्वंगु दु। विज्ञपिनिगु धापू कथं चीनय् थीथी देशं थः जनतायात लित यंकेगु प्रक्रिया न्ह्याकेधुंकूगु दु। तर नेपालं नेपाःमियात उद्धार यानाः हयाः तयेगु थाय्या व्यवस्था यायेत तकं निवाः स्वयां अप्वः ई कायेधुंकूगु धइगु संक्रमण प्रति सरकार गम्भीर मजू धइगु स्पष्ट याः ।

अझ विज्ञतय् कथं नेपाः सरकारं कोरोना भाइरसया संक्रमण नेपालय् जुइके मबित गुगुं नं कथंया तयारी तकं मयाःगु द्वपं बियाच्वंगु दु। यदि विज्ञपिनिगु द्वपं कथं धायेगु खःसा सरकार ल्वय्या बारे उलि गम्भीर मजूगु खँ यच्चुक सीदु। सरकार ल्वय् प्रति थुकथं छाय् लापर्वाही जुल धइगु न्ह्यसः ब्वलनाच्वंगु दुसा विज्ञपिंसं धाःसा ल्वय् नियन्त्रणया बारे सरकारं आपालं गल्ती यानाच्वंगु दु। विज्ञतय् धापू कथं थ्व स्वयां न्हापा नेपाः वःपिं निम्ह नेपाःमि नागरिकयात झिंप्यन्हु आइसोलेसनय् तयाः निगरानी यायेमाःगु खःसां नं उमित प्यन्हु लिपा हे अस्पतालं डिस्चार्ज याःगु दु। जब कि विश्व स्वास्थ्य संगठनं धयाच्वंगु दु – निवाः तक आइसोलेसन सेन्टरय् तयाः जक उमित त्वःते फइ ।

मेखे चीनं उद्धार यानाहइपिं नेपाःमिया बारे सरकारं धाःसा चीनं ल्वय् दुपिंत नेपालय् हयेगु मखु धासें ल्वय् लायेधुंकूपिंत जक नेपाः हयेगु खँ धयाच्वंगु दु। थ्व धइगु थः नागरिक प्रति सरकार गुलि तक जिम्मेवार धइगु न्ह्यसः थन ब्वलनाच्वंगु दु। आः तक विश्वया अभ्यास छु ले धायेबलय् गुगु नं देशय् गुगुं नं कथंया थः जनतायात खतरा खन धाःसा सम्बन्धित देशं थः नागरिकयात दकलय् न्हापां उद्धार यायेगु याइ । तर थन सरकारं बिउगु लिसलं सरकार जनता प्रति जिम्मेवार मदु धकाः स्पष्ट यानाबिउगु दु। थ्वहे झ्वलय् चीनं लिहां वःपिं खुइम्ह मनूत शुक्रराज ट्रपिकल तथा सरुवा अस्पतालय् वासः यायेत थ्यंगु दु। तर उमित आइसोलेसनय् तयाः वासः यायेगु स्वयां नं उमित सामान्य चेकजाँच यानाः उमित लित छ्वयेधुंकूगु दु । तर आः छुं जुयाः उपिं मनूतय्त कोरोना भाइरस संक्रमण जूगु खःसा उकिया लिच्वः छु जुइगु खः धइगु न्ह्यसः थन ब्वलनाच्वंगु दु ।

सरकारं कोरोना भाइसरया बारे आः तक गम्भीर रुपं मकाः धइगु थ्व छगू दसु खः । मेता खँ धइगु चीनं लिहां वःपिं उलिमछि मनूतय्सं थः हे जिम्मेवार जुयाः अस्पतालय् वयाः जाँच याकः वयाच्वंगु दुसा उकियात कयाः सम्बन्धित चिकित्सकपिंसं नं गम्भीर रुपं कायेमाःगु खः । तर अस्पतालया रेकर्ड स्वयेगु खःसा थन चिकित्सकपिनिगु नं लापर्वाही मजू धकाः धाये फइगु अवस्था धाःसा मदु । चीनं लिहां वःपिं खुइम्ह मनूतय्सं थःपिं ल्वचं प्रभावित खः कि मखु धकाः वयेधुंकाः सामान्यतया चिकित्सकया दायित्व खः कि उमित विश्व स्वास्थ्य संगठनया नियम कथं आइसोलेसनय् तयाः निगरानी यायेगु, तर उगु ज्या थन जुयाच्वंगु मदु, अथे धइगु थन सरकारया लिसें चिकित्सक नं आः विश्वन्यंकं न्यनावनाच्वंगु भाइरसया बारे उलि गम्भीर मदु ।

थौं तक नेपालय् भाइरसया विरामी लूगु मदुनि । तर आः गुलिं नं आइसोलेसनय् तयाः जाँच यायेमाःपिं विरामीयात स्वतन्त्र त्वःतूगु दु । थुकिं भविष्य नेपाःयात लिच्वः मलाकी धकाः धायेफइगु अवस्था मदु ।

चीनय् च्वनाच्वंपिं नेपाः विद्यार्थी बारे नेपाः गम्भीर जुइफइ च्वंगु मदु, तर चीन सरकार धाःसा नेपाःया विद्यार्थी बारे गम्भीर जुयाः धायेगु यानाच्वंगु दु –  ल्वचं कःपिं नेपाःया विद्यार्थीयात वासः यायेधुंकाः जक नेपालय् हये । थुकिं छु क्यं धाःसा नेपाः सरकार आः तक नं थः जनतायात गुकथं सुरक्षित यायेगु धकाः योजना दयेके तकं असफल जूगु दु । अथे धइगु नेपाःया सरकार जनताया स्थितिप्रति गैरजिम्मेवार जुयाच्वंगु दु ।

सम्बन्धित बुखँ

LEAVE YOUR COMMENTS