यल मनपाया छेँ ल्याः मेट्रिक ठेगाना प्रणालीइ

यल – यल महानगरपालिकां मनपा दुनेया छेँया ल्याः मेट्रिक प्रणालीपाखें तयेगु ज्या न्ह्याकूगु दु । यल मनपाया प्रमुख चिरिबाबु महर्जनं स्वखा छेँय् मेट्रिक प्रणालीया नम्बर तिकाः उकिया शुरुवात यानादीगु खः ।

यल मनपा प्रमुख महर्जनं यल महानगरपालिकाया ज्याकुथिइ ‘१८७३ सत्यमोहन जोशी मार्ग, वडा नं ३ या ज्याकुथिइ ‘२९१ पूच्व- झम्सिख्यः मार्ग’ व सेन्ट मेरिज स्कुलया लुखाय् ‘३५ भनिमण्डल मार्ग’ च्वयातःगु प्लेट तिकाः उगु ज्याया शुभारम्भ यानादीगु खः ।

छेँया ल्याः मेट्रिक प्रणालीइ तिकेगु ज्याया शुरु यासें प्रमुख महर्जनं छेँ नं.या प्रणालीया विकासं छेँ पत्ता लगे यायेत खने दयाच्वंगु समस्या मदइगु व स्मार्ट सिटीया परिकल्पना सकारात्मक यायेत ग्वाहालि जू वनीगु विश्वास प्वंकादिल ।

यल मनपा नक्सा शाखाया प्रमुखलिसें इन्जिनियर श्रीकुमार महर्जनं यल मनपा दुनेया छेँल्याःयात मेट्रिक प्रणालीइ यंकेगु थ्व अभियान निगू चरणय् न्ह्याइगु जानकारी बियादिल । यल मनपाया परामर्श दाता ईश्वरमान जोशीं यल मनपाय् व्याप्त जुयाच्वंगु धू व ध्याचःया कारणं छेँ ल्याखायेत तकं समस्या जुयाच्वंगु जानकारी बियादिल ।

थःगु छेँय् थुकथंया नम्बर प्लेट तयेत इच्छुक छेँथुवालं छेँ-बुँया करण पुलातःगु जुइमाःगु व नम्बर प्लेटया निंतिं द्वःछि तका शुल्क पुलेमाःगु येँ मनपां न्ह्यथंगु दु ।