जनगणनाया जातीय तथ्यांकय् जनजाति दथुइ हे विवाद
येँ (नेपालभाषा टाइम्स)- राष्ट्रिय तथ्यांक विभागं सार्वजनिक याःगु तथ्यांकय् जातजातिया ल्याःयात कयाः सम्बन्धित जनजाति समुदाय दथुइ हे कचवं पिहां वःगु दु । गुरुङ, मगः, थारु, राई, लिम्बु समुदायं थःगु समुदाययात तछ्यानाः तथ्यांक पिकात धासें उकियात संशोधन यायेत दबाब बियाच्वंगु दुसा उगु समुदायपाखें तज्यानाः पिहां वःगु जातितय्सं धाःसा थ्व तथ्यांकयात संशोधन याये दइ मखु, हुबहु लागू यायेमाः धकाः सः तयाहःगु दु ।
थुकिं यानाः न्हू पिहां वःगु तथ्यांकयात कयाः आदिवासी जनजाति दथुइ हे मतभेद ब्वलंगु दु । तथ्यांक संशोधन याये दइ मखु धाइपिनि पुचःपाखें म्हिगः थन छगू पत्रकार सम्मेलन हे यासें विभागं पिकाःगु तथ्यांक सही खः, उकी संशोधन यानाः थःगु जातियात स्याये दइ मखु धकाः खबरदारी याःगु दु । म्हिगः आदिवासी किराँत महासंघ व राष्ट्रिय आदिवासी जनजाति महासंघ नांगु निगू संस्थां मंकाः कथं पत्रकार सम्मेलन याःगु खः ।
थौंकन्हय् जनगणनाय् पिहां वःगु तथ्यांक मध्यय् कुलुङ, बान्तवा, चाम्लिङ, याम्फू, नाछिरिङ, बाहिङ, थुलुङ, खालिङ, आठपहरिया, मेवाहाङ, साम्पाङ, लोहोरुङ व जेरो÷जेरुङ जातियात राई दुने हे तयेमाः धकाः सः थ्वयाच्वंगु दु । अथे हे रिल्ली घलेयात गुरुङ दुने तयेमाःगु, पुनयात मगः दुने तयेमाःगु व रानाथारुयात थारु दुने तयेमाः धकाः नं माग जुयाच्वंगु दु । म्हिगः पत्रकार सम्मेलन याःगु पुचलं धाःसा थ्व जातितय्त आः धलखं चीके दइ मखु धासें वहे कायम यायेत माग याःगु दु ।
थ्वहे झ्वलय् प्रधानमन्त्री पुष्पकमल दाहालं देशय् दुगु जातजातियात तथ्यांकया नामय् तछ्याये मजिउ धासें तथ्यांक संशोधन यायेगु खँ कनादीगु दु । नेपाल मगर संघं ग्वसाः ग्वःगु भुम्या पर्वया ज्याझ्वलय् न्ववासें वय्कलं उगु खँ धयादीगु खः । वय्कलं मगर लगायत आदिवासी समुदायं केन्द्रीय तथ्यांक विभागं जनगणनाया झ्वलय् विभाजन याःगु गुनासो थःत वःगु धासें उकियात भिंकेत थम्हं निर्देशन बीगु खँ नं धयादीगु दु ।
वय्कलं थुमिगु हे बलिदानं नेपालय् लोकतन्त्रया आन्दोलन सफल जूगु खः धासें अज्याःगु समुदायया अहित जुइगु गुगुं नं ज्या मयायेगु खँ नं धयादिल ।
LEAVE YOUR COMMENTS