वैशाखं चुनाव याकेत दलतलिसे सहलह

येँ (नेपालभाषा टाइम्स) – निर्वाचन आयोगं सरकारं क्वःछिउ कथं वैशाख १७ व २७ गते प्रतिनिधिसभाया चुनाव यायेगु बारे राजनीतिक दलया नेतापिं लिसे सहलह याःगु दु । तर नेकपा दाहाल-नेपाल पुचःया नेता राजेन्द्र पाण्डें निर्वाचन आयोगं धाःथें निर्वाचनया तयारीइ थःपिं मवनेगु खँ धयादीगु दु । वय्कलं सर्वोच्च अदालतय् मुद्दा विचाराधीन जुयाच्वंगु अवस्थाय् तत्कालीन निर्वाचनया ज्याझ्वः न्ह्यःने मन्ह्याकेत नं निर्वाचन आयोगयात इनाप यानादीगु दु ।

मेखे नेपाली कांग्रेसया नेता आनन्दप्रसाद ढुंगानां धाःसा निर्वाचनया पक्षय् थःपिं दुगु खँ धयादीगु दु । वय्कलं निर्वाचन आयोगं गुगुं नं इलय् निर्वाचन याकल धाःसा तयार जुयाच्वनेमाः धासें सर्वोच्च अदालतं संसद पुनर्स्थापना यात धाःसा उकियात स्वीकार यायेगु व निर्वाचनय् वनेमाःगु अवस्था वल धाःसां नं थःपिं तयार दुगु खँ धयादीगु दु ।

निर्वाचन आयोगं वइगु माघ १५गते निसें २१ गते तक मतदाता नामावली अद्यावधिक यायेगु तयारी यानाच्वंगु दु । आयोगं मतदानस्थल व मतदान केन्द्र पुनरावलोकन यायेगु बारे नेतातय्त जानकारी याकूगु खः ।