अनाथलयं निसें वृद्धाश्रम तक

हिन्दी चिबाखं : रिचा तिवारी

वृद्धाश्रमं पिहां वःगु न्यागू मिनेट हे मजाःनि, श्यामया मोबाइल न्यात । श्यामयात थः अबुयात कयाः छुं भचा चिन्ता ला जूगु हे खः, तर थः कलातं जिद्दी याःगुलिं श्यामं थौं थः अबुयात वृद्धाश्रमय् त्वःतः वयेमाल । दछि न्ह्यः वया मां मदुसेलिं अबुम्ह तसकं नुगःमछिंका च्वनीम्ह जुयावल । न्हिं न्हिं छुं कि छुं खँय् कचकच जुया हे च्वनीगु। न्ह्यागु खँय् नं अबुयात हे दोष बीगु याइगु ।

श्याम अफिसया झिघौ ज्या यानाः तसकं न्ययेकाः छेँय् लिहां वइबलय् छेँय् झासु लनेदइ धकाः मती तयाः वइगु खः, तर छेँय् ला वयां न्ह्यः हे मेगु हे लकस जुयाच्वने धुंकी । झिला ति दत जुइ, छँया लकस थथे जुयाच्वंगु। मां मदुगु निला लिपा हे कलाः सरला बायात वृद्धाश्रम तये यंकेमाल धकाः धायेगु यानाहःगु खः ।

शुरुइ ला श्यामं थ्व खँ अथे फासांफुसुं जुयाच्वनी धकाः च्वंगु खः । तर खँ अथे मजुल । सरलाया न्ह्यःने श्यामं नं छुं यायेमफुत । श्याम थः अबुया सामान दक्व ज्वनावनाः वयात वृद्धाश्रमय् त्वःताः नं लिहां वयेधुंकल ।

श्यामं छथाय् दिनाः मोबाइल खल्तिं लिकया स्वत । कल वया कलाः सरलायागु हे लानाच्वनं । श्यामं फोन ल्ह्वनाः ‘हल्लो’ धाल ।

‘आः गबाय्त च्वनेमानि अन, अन हे च्वने त्यना लाकि छु थौं, अले अँ, छिमि बुराम्ह अबुयात धयाथकि, नखः चखःबलय् नं छेँय् वयाच्वने म्वाः, जिपिं थःपिं वयाः हे नापलाः वये धकाः’ थुलि धयाः सरलां फोन दिकल ।

फोन दिइवं श्याम अन फहिलाः लिहांवन । भचा जाःबलय् व वृद्धाश्रमय् थ्यने हे धुंकल । वृद्धाश्रमया गुगु क्वथाय् त्वःताथकागु खः, अन क्वथाय् थः अबुयात मखनाः उखेथुखे माल । श्याम थः अबुयात मामां गार्डेनय् थ्यंवन । अनं ततसलं न्हिउगु सः ताये दयाच्वन । न्ह्यःने वनाः स्वःबलय् वया अबु छम्ह बुरालिसे खँ ल्हानाः न्हिलाच्वंगु जुयाच्वन ।

अबुलिसे च्वनाच्वंम्ह व हे मनू लानाच्वन, गुम्हेसित वं रिशेप्सन काउन्टरय् नापलाःगु खः । श्यामं थ्व खँ थुइके मफयाच्वन कि वया अबुयात व मनुखं गथे म्हसीकल । श्यामं व मनूयाके न्यन, ‘सर, छिं जिमि बाःयात गथे यानाः म्हसीकादिया ?’

थ्व न्यनाः उम्ह बुरां लिसः बिल, ‘बाबु छु निदँ दुबलय् थ्वय्कलं नीन्यादँ न्ह्यः छगू अनाथालयं कयायंकूगु खः, अले उबलय् जिं हे छंत थ्वय्कःया ल्हातय् लःल्हानाबियागु खः । अले थौं छं थ्वय्कःयात जिगु ल्हातय् लःल्हाना थकल ।’

भाय् हिउम्ह : रमेशकाजी स्थापित

सम्बन्धित बुखँ

LEAVE YOUR COMMENTS