अमेरिकाय् साहित्य गोष्ठी

येँ – अमेरिकाय् वासः याकाच्वंम्ह नेपालभाषा परिषद्या न्वकु नविन चित्रकारं थः भर्ना जुयाच्वंगु अस्पतालय् हे छगू साहित्य गोष्ठी यानादिल । अमेरिकाय् क्रियाशील अमेरिकी साहित्यकारपिं मुनाः अस्पतालया क्वथाय् हे जूगु उगु साहित्य गोष्ठीइ कविता पाठया लिसें नेपालभाषा साहित्य बारे नं चर्चा जूगु खः ।

उगु इलय् साहित्यकार चित्रकारं नेवाः साहित्यकारतय्त राज्यं विभेद यानातःगु जुयाः उमिगु कविताय् विद्रोह यक्व दुगु खँ कनादिल । वय्कलं थम्हं अनुवाद यानादीगु नेपालभाषाया न्यापु कविता नं अन पाठ यानादीगु खः ।

छुं ई न्ह्यः मस्तिष्कघात जुयाः उसाँय् मदुम्ह भाजु चित्रकार थौंकन्हय् मिनोसोट्टाया सनहाइट अस्पतालय् वासः याकाच्वनादीगु दु । वय्कःया स्वास्थ्यय् तीव्र सुधार जुयाच्वंगु खँ चिकित्सकतय्सं धाःगु दु ।