सैन्य सम्झौता सेनां मसिउ
येँ -अमेरिकां प्रस्ताव यात धकाः चर्चाय् वःगु ‘स्टेट पार्टनरसिप प्रोग्राम (एसपीपी)’ सम्झौता बारे नेपाली सेनां अनभिज्ञता प्वंकूगु दु । एसपीपी सम्झौता सम्बन्धी छुं नं कथंया औपचारिक वा अनौपचारिक मस्यौदा सेनायात मवःगु धासें सैनिक प्रवक्ता (सहायक रथि) नारायण सिल्वालं थ्व खँ सञ्चार माध्यमय् गय् यानाः वल खः, थःपिंसं मसिउ धयादीगु दु ।
नेपाःया उच्च भूभागय् मंकाः सैन्य अभ्यास, नेपाली सेनाया अधिकृतया नितिं अमेरिकाय् फेलोसिप ज्याझ्वः, अमेरिकी नेशनल गार्डया अधिकृतपिंत नेपाःया राष्ट्रिय प्रतिरक्षा विश्वविद्यालयय् फेलोसिप थेंज्याःगु विषय कःघानातःगु उगु सम्झौता बारे सैनिक प्रवक्तां अनभिज्ञता प्वंकूगु खः ।
थ्वहे झ्वलय् परराष्ट्र मन्त्री डा. नारायण खड्कां अमेरिकां प्रस्ताव याःगु इन्डोप्यासिफिक स्ट्राटेजी सैन्य गठबन्धन मखुसें मानवीय ग्वाहालिया नितिं दयेकूगु कार्यक्रम खः धयादीगु दु ।
प्रतिनिधिसभाय् म्हिगः सांसदतय्सं न्यंगु न्ह्यसःया लिसः बिसें मन्त्री खड्कां इन्डोप्यासिफिक छुं नं कथंया औपचारिक एलायन्स मखु धासें धयादिल, ‘थ्व नेपाःयात सैन्य गठबन्धनय् कायेगु सम्झौता खः कि धइगु न्ह्यसः ब्वलनाच्वगु दु, म्हिगः एमसीसी पारित यायेगु झ्वलय् नं झीसं इन्डो प्यासिफिक स्ट्राटेजीया खँ ल्हाना, इन्डो प्यासिफिक गुगुं फर्मल एलायन्स नं मखु, इन्डियन ओसियनं वेस्ट ओसियन तकया छगू कनेक्सन जक खः ।’
वय्कलं निगू महासागर इन्डियन ओसियन व पश्चिम प्रशान्त महासागरय् लाःगु भू–भागयात स्वाइगु कन्सेप्ट हे इन्डोप्यासिफिक खः धासें धयादिल,
‘थ्व भागय् लाःगु थ्यंमथ्यं नीप्यंगू देय्लिसे खुला व्यापार, सार्वभौमिकताया सम्मान यायेगु खँयात कयाः दयेकूगु छगू छ्वासुगु अर्गनाइजेसन खः, जिं थू कथं फर्मल टिट्री छुं नं मखु, उकिया अन्तर्गत न्हापा एमसीसी व आः एसपीपी खः ।’
परराष्ट्र मन्त्री खड्कां स्टेट पार्टनरसीप प्रोग्राम (एसपीपी) धइगु अमेरिकां मानवीय ग्वाहालिइ प्राकृतिक प्रकोपयात सम्बोधन याइगु, सांस्कृतिक क्षमता कालबिल यानाः अभिवृद्धि याइगु ज्याझ्वः जक खः धकाः नं स्पष्ट यानादीगु दु ।
LEAVE YOUR COMMENTS