भारतं लिपुलेकय् दयेकूगु लँया विरोध

येँ – भारतं आः नकतिनि नेपाःया लिपुलेक जुयाः चीन व भारत स्वाइगु लँपु दयेकूगु खँयात कयाः नेपाः दुने तीव्र विरोध शुरु जूगु दु । भारतया धार्चुला व चीनया कैलाश मानसरोवर स्वायेगु कथं थ्व लँपु दयेकूगु खः । शुक्रवाः भारतया रक्षामन्त्री राजनाथ सिंहं भिडियो मार्फत उगु लँपुया उलेज्या यानादीगु खः ।

भारतं आः दयेकूगु थ्व लँपु नेपाःया भूभाग लिपुलेक जुयाः वनाच्वंगु दु । लिपुलेकया भूमियात कयाः नेपाः व भारत दथुइ विवाद जुयाच्वंगु दनि । थ्व क्षेत्रयात विवादास्पद भूमि धकाः भारतं नं स्वीकार यानातःगु दु । थःपिंसं हे विवादास्पद भूमि धकाः स्वीकार यानातःगु क्षेत्रय् मेगु पक्ष (नेपाः) याके छसः तकं मन्यँसे लँ दयेकेगु ज्यायात भारतया हेपाहा प्रवृत्ति धकाः आलोचना यानाहःगु दु ।

भारतं थ्व लँ दयेकूगु खँयात कयाः नांजाःम्ह परराष्ट्रविद् हिरण्यलाल श्रेष्ठं कडा विरोध यानादीगु दु । शुक्रवाः ‘नेपालभाषा टाइम्स’ लिसे खँ ल्हासें भाजु श्रेष्ठं भारतं थ्व लँ दयेकूगु बारे नेपाः सरकारया आधिकारिक धारणा पिहां वयेमाःगु माग यानादीगु दु ।

थ्व मामिलाय् न्हूदिल्लीया नेपाली राजदूत तसकं सुस्त जूगु द्वपं बिसें भाजु श्रेष्ठं धयादिल, ‘भारतं थज्याःगु लँ दयेकाच्वंगु खःसा नेपाःया राजदूतावासं नेपाःयात तुरुन्त जानकारी बीमाःगु खः । छाय् सुम्क च्वंच्वन ?’

छुं ई न्ह्यः तिनि भारतं पिकाःगु थःपिनि न्हूगु नक्साय् कालापानी क्षेत्रयात थःगु भूभाग दुने लाका तल धकाः नेपालय् व्यापक विरोध जूगु खः । नेपालय् व्यापक विरोध जुइवं भारतं ‘थुकिया बारे बिचाः याये’ धाःगु खः । तर उकी बिचाः यायेगु पलेसा आः वयाः झन् लँ हे दयेकूगुलिं थ्व नेपाःयात हेपे याःगु हे खः धकाः नं थन थुइका हःगु दु ।

छुं दँ न्ह्यः भारत व चीनं थ्वहे थासय् लँ दयेकाः निगू देय् दथुइ व्यापार शुरु यायेगु सम्झौता याःगु खः । तर नेपालं उगु भूमि विवादास्पद क्षेत्र जूगुलिं अन छुं निर्माण याये न्ह्यः थःपिनिगु नं सहमति कायेमाः धकाः विरोध यायेवं चीन उगु सहमतिपाखें लिचिउगु खः । तर चीन सहमतिपाखें लिचिउसां भारतं धाःसा उगु थासय् थःगु दावी मत्वःतुसे च्वनाच्वंगु खः ।

कोभिड-१९ महामारीया कारणं विश्व हे लकडाउन जुयाच्वंगु इलय् भारतं उगु लँ दयेकाः उद्घाटन याःगु नं तसकं शंकास्पद जूगु खँ भाजु श्रेष्ठं यानादीगु दु । वयकलं धयादी, ‘विश्व हे ठप्प जुयाच्वंगु इलय् भारतयात उगु लँ छाय् आवश्यक जुल ?’

भिडियो मार्फत चीन व भारत स्वाइगु लँपुया उलेज्या जूगु बारे भारतया रक्षामन्त्री राजनाथ सिंहं यानादीगु ट्वीट ।

सम्बन्धित बुखँ

LEAVE YOUR COMMENTS