सभामुख उम्मेदवार सापकोटा विरुद्ध प्रदर्शन

येँ (प्रतिनिधिसभाया सभामुख पदय् उम्मेदवारी बिउम्ह सत्तारुढ नेपाल कम्युनिष्ट पार्टी (नेकपा) या नेता अग्नि सापकोटाया विरोधय् येँय् प्रदर्शन जूगु दु । कर्तव्य ज्यान मुद्दाया गम्भीर द्वपं लानाच्वंम्ह सापकोटायात सभामुख दयेके मजिउ धासें म्हिगः थनया माइतीघर मण्डलाय् विरोध प्रदर्शन जूगु खः ।

विरोध प्रदर्शनया झ्वलय् ‘मनू स्याःगु घटनाय् अनुसन्धानया झ्वलय् दुम्ह मनूयात सभामुख मदयेके, पीडितयात अझ पीडा बीगु व अपमानित मयाये, मानवअधिकार व कानुनी शासनया सम्मान याः’ धइगु नारा बिउगु खः । सशस्त्र आन्दोलन जुयाच्वंगु इलय् २०६२ साल वैशाख १६ गते काभ्रेया छत्रबाँझस्थित कृष्ण माध्यामिक विद्यालय व्यवस्थापन समितिया अध्यक्ष अर्जुन लामायात अपहरण लिपा हत्या यायेगु ज्याय् सापकोटाया ल्हाः दु धासें मुद्दा दायर जूगु खः ।

अपहरणय् लाःगु निला लिपा काभ्रेया हे तत्कालीन बुढाखानी गाविसया चारकिल्ला धाःगु थासय् ल्हाकातःगु अवस्थाय् लामाया सीम्ह लूगु खः । घटनाय् तत्कालीन माओवादी नेता सापकोटा, सूर्यमान दोङ, यादव पौडेल, भोला अर्याल, कर्णाखर गौतम व नोर्बु मोक्तान दुथ्याःगु धासें लामाया कला पूर्णिमायां जिल्ला प्रहरी कार्यालय काभ्रेय् किटानी जाहेरी बिउगु खः ।

सापकोटायात उम्मेदवारी दयेके न्ह्यः नं पार्टीया दथुइ थ्व न्ह्यसः ब्वलंगु खःसा उकियात समाधान याये फइगु लिसः अध्यक्ष पुष्पकमल दाहालं बीवं सापकोटायात सभामुख दयेकेत पार्टी तयार जूगु खः।

सम्बन्धित बुखँ

LEAVE YOUR COMMENTS