आः मरु सतः गबले चायेकी थें ?
येँ (नेपालभाषा टाइम्स)÷ विश्व सम्पदाया धलखय् लाःगु हनुमानध्वाखा क्षेत्रया मरु सतः लागाय् नं आः पार्किङ निषेध याःगु दु । वंगु महानगर दिवसया लसताय् येँ मनपा २० वडा, हनुमानढोका दरवार संरक्षण कार्यक्रम व नेपाली सेनाया शार्दुल जंग गुल्म जानाः यचुपिचु यासें गमला तयाः सौन्दर्यकरण याःगु खः । थुकिया नापं अन पार्किङ नं बन्द जूगु दु ।
मरु सतः लागाया सौन्दर्यकरण लिपा आः मरु सतः गबले चायेकीगु जुइ धकाः नं न्ह्यसः तया हःगु दु । २०७२ सालया तःभुखाचं पाःताः जुइक दुना वंगु मरु सतः पुनर्निर्माण याःगु खःसा वयां लिपा हानं चायेकेगु ज्या मजूनि ।
मरु सतः पुनःनिर्माण समितिं वंगु थःगु ज्या क्वचायेकाः मनपायात प्रतिवेदन बीधुंकूगु दुसा मनपां उकियात कयाः आः सम्पदा विज्ञसहितया पुचलं अध्ययन यानाच्वंगु दु । प्रतिवेदन अध्ययन क्वचायेकाः मरु सतः चायेकेगु बारे निर्णय जुइगु खँ धाःगु दु ।
२०७५ साल वैशाख १८ गते जनप्रतिनिधि व स्थानीय वासिन्दाया निर्णयपाखें तत्कालीन प्रदेशसभा सांसद राजेश शाक्यया अध्यक्षताय् मरु सतः पुनः निर्माण समिति नीस्वनाः पुनर्निर्माणया ज्या न्ह्याकूगु खः । उकिया लागिं येँ महानगरपालिकां आवश्यक आर्थिक खर्च चूलाकूगु खः ।
LEAVE YOUR COMMENTS