विराटं जगतसुन्दर मल्ल बुन्हि हन

ख्वप- नेपालभाषाया प्यंग थां मध्ये छगः थां मा.जगतसुन्दर मल्लया १३९ दँ बुन्हि विराट नेपालभाषा साहित्य सम्मेलन गुथि, ख्वपं खःमा त्वालय् च्वंगु वय्कःया झ्वाताय् स्वांमा क्वखायेकाः हन । विराटया नायः भाजु महेन्द्रगोपाल कर्माचार्यया सभापतित्वय् जूगु ज्याझ्वलय् वरिष्ठ साहित्यकार तिलक प्रकाश कायस्थं जगतसुन्दर मल्ल विदेशी साहित्ययात नेपालभाषाय् भाय्हिला– दीम्ह न्हापांम्ह व्यक्ति खः धयादिल ।

ज्याझ्वलय् विराटया सल्लाहकारपिं नरेन्द्रभक्त हाडा व त्रिरत्न शाक्यपिंसं मा. जगतसुन्दर मल्लया बहुआयामिक व्यक्तित्वया चर्चा यानादीगु खः । ज्याझ्वलय् ओमकृष्ण श्रेष्ठं चिनाखँ न्यंकादीगु खः ।
ने.सं. १००३ कौलागा त्रयोदशी (वि.सं १९३९ कार्तिक १५ गते) खुन्हु ख्वपया खःमा त्वालय् बूम्ह मा.जगतसुन्दर मल्ल ‘मथां आखः सयेकेगु जूसा मांभासं ब्वंकादिसँ’ धकाः अभियान न्ह्याकादीम्ह भाषासेवी खः । वय्कलं मांभासं शिक्षा बीत ख्वपया खःमा त्वालय्, नापं येँया असं व न्हाय्कं त्वालय् मस्त मुंकाः नेपालभाषां ब्वंकेगु ज्या यानादीगु खः ।

वय्कलं अंग्रेजी भाषाया इसपया बाखंयात नेपालभाषां ‘इसपं दयेकूगु बाखं’ नांमं भाय्हिलाः छापे यानाः इनेगु ज्या यानादीगु खः । नेपालभाषाप्रति तसकं मतिना दुम्ह वय्कलं इंग्लिस नेपालभाषा डिक्सनरी, नेपालभाषा इंग्लिस डिक्सनरी, नापं थीथी सपूm च्वयादीगु दु ।