राजदूतया खँय् नेकां–एमाले ल्वापु
येँ (नेपालभाषा टाइम्स)÷ थीथी देय्या लागिं राजदूत सिफारिस याःपिं मनूतय् नांयात कयाः सत्तारुढ निगू दल नेकपा एमाले व नेपाली कांग्रेस दथुइ मतभेद ब्वलंगु दु । छगू दलं राजदूत सिफारिस याःम्ह मनूया विरुद्ध मेगु दलं विरोध यायेवं संसदीय सुनुवाई समितिया बैठक तकं च्वने फयाच्वंगु मदुनि ।
निगू पार्टी जानाः थीथी १७ गू देय्या लागिं राजदूत सिफारिस याःगुली प्यम्ह मनूया नामय् विवाद जुयाच्वंगु दु । थ्व प्यम्ह खः– शंकरप्रसाद शर्मा (भारत), धनप्रसाद पण्डित (इजरायल), कपिल श्रेष्ठ (दक्षिण अफ्रिका) व डा. नेत्रप्रसाद तिम्सिना (मलेशिया) । थुकी डा. तिम्सिना एमालेपाखें प्रस्तावित खःसा मेपिं स्वम्ह कांग्रेसपाखें प्रस्तावितपिं खः । थ्व प्यम्हेसिगु विरुद्ध संसदीय सुनुवाई समितिइ उजुरी नं लानाच्वंगु दु ।
उकी मध्ये एमालेपाखें प्रस्तावित नेत्रप्रसाद तिम्सिना विरुद्ध न्हापा नेपाल रेडक्रस सोसाइटी तदर्थ समितिया अध्यक्ष जूगु इलय् थःगु कार्यकाल सिधयेधुंकाः नं संस्थाया लेटरप्याड व छाप छ्यलाः ज्या याःगु धइगु उजुरी दु । थ्व खँय् वय्कःया विरुद्ध सर्वोच्च अदालतय् मुद्दा तकं न्ह्यानाच्वंगु दनि । अदालतय् मुद्दा लानाच्वंम्ह मनूयात राजदूत दयेकेगु मिले मजू धकाः कांग्रेस सांसदतय्सं विरोध यायेवं एमालें नं कांग्रेसपाखें प्रस्तावित मेपिं स्वम्हेसिया विरुद्ध विरोध शुरु यानाहःगु खः । कांग्रेसपाखें प्रस्तावित स्वम्ह मध्ये धनप्रसाद पण्डित (इजरायल) न्हापा पद्मकन्या बहुमुखी क्याम्पसया प्रमुख जुयाच्वंगु इलय् सूचना आयोगपाखें दण्डित जूम्ह खः । शंकर शर्मा (भारत) न्हापा नं भारतया हे राजदूत खःसा वय्कःयात लिसा कयाः वहे देशया राजदूत दयेके मजिउ धइगु उजुरी लानाच्वंगु दु । कपिल श्रेष्ठ (द. अफ्रिका) न्हापा राष्ट्रिय मानव अधिकार आयोगया दुजः जुइधुंकूम्ह जूगुलिं संविधान कथं छुं नं आयोगया दुजः जुइधुंकूम्ह मनू गनं नं राजनीतिक नियुक्तिया लागिं योग्य जुइ मखु धइगु उजुरी लानाच्वंगु दु ।
थ्व स्वयां न्ह्यः अष्ट्रेलियाया लागिं सिफारिस जूम्ह कान्ता रिजालया नां सुनुवाई न्ह्यः हे काटे जूगु खःसा वय्कःया थासय् कांग्रेसं पुलांम्ह उपसभामुख चित्रलेखा यादवया नां प्रस्तावित याःगु दु ।
विवादय् लाःपिं थ्व प्यम्ह बाहेक मेपिं राजदूत पिनि नांयात सुनुवाई समितिं स्वीकृत यायेधुंकूगु दु । तर थ्व प्यम्हेसिया नां छु यायेगु धकाः निर्णय मजूगुलिं मेपिंत नं नियुक्त याये फयाच्वंगु मदुनि ।
सरकारं कृष्णप्रसाद ओली (चीन), लोकदर्शन रेग्मी (अमेरिका), चन्द्र घिमिरे (बेलायत), शिवमाया तुम्बाहाम्फे (द. कोरिया), नरेश विक्रम ढकाल (साउदी अरब), डा. शैल रुपाखेती (जर्मनी), सनिल नेपाल (स्पेन), रामकृष्ण भट्टराई (श्रीलंका), प्रकाशमणि पौडेल (पोर्चुगल), रिता धिताल (पाकिस्तान), सुम्निमा तुलाधर (डेनमार्क) व जंगब चौहान (रुस) या नां नं सिफारिस याःगु खः । वय्कःपिनि नां सुनुवाई समितिं स्वीकृत यायेधुंकूगु दु । राजदूतपिनि नां समावेशी मजुल धकाः नं समितिइ स्वंगू उजुरी लाःगु खः ।
LEAVE YOUR COMMENTS