यलया मुख्य मुख्य सतकय् स्मार्ट मत

येँ – यल महानगरपालिकां यलया मुख्य सतकय् स्मार्ट मत जडानया तयारी न्ह्याकूगु दु । उकिया निंतिं यल मनपां नेपाल विद्युत प्राधिकरणलिसे सहकार्य याःगु खः । यल मनपा व प्राधिकरणया सहकार्यय् महानगर लागाया मुख्य मुख्य सतकय् स्मार्ट मत जडान यायेत्यंगु खः ।

यल मनपाया प्रवक्ता राजु महर्जनं चालु आर्थिक दँया दुने हे क्वचायेगु लक्ष्यं ठेक्का सम्झौता जूगु जानकारी बियादीगु दु । प्राधिकरणलिसेया सहकार्यकथं न्हापांगु चरणय् कुपण्डोलनिसें लगंख्यःतक व निगूगु चरणय् ल्यं दुगु थासय् स्मार्ट मत जडान यायेगु सहमति जूगु खः । निगू चरणय् मत जडानया निंतिं सहमति जूगु खःसां आः दक्वं थासय् छक्वलं ज्या न्ह्याकेगुकथं न्ह्याः वनाच्वनागु प्रवक्ता महर्जनं धयादिल ।

वइगु दछिया दुने महानगरया मुख्य सतकया दक्वं थासय् स्मार्ट मत जडान यायेगु जुइ’, वय्कलं धयादिल । महानगरया मुख्य मुख्य न्यागू सतकय् स्मार्ट मत जडान यायेगु योजनाकथं कोपुण्डोलं पूच्व जुयाः लगंख्यः, पूच्वं मंगलबजाः जुयाः ग्वार्को, कुपण्डोलं यलध्वाखा जुयाः मंगलबजाः, एकान्तकुनां बुंग व सातदोबाटों धापाख्यतक सतक मत जडान याइगु जूगु दु ।

महानगरपालिकां जडान यायेत्यंगु स्मार्ट मत मेमेगु सतक मत स्वयां फरक जुइगु व थ्व मत सतकय् वनाच्वंपिं मनू मदइगु व सवारी साधन संचालन मजुइगु अवस्थाय् स्वत सीगु व मनू वा सवारी साधन वल धाःसा स्वतः च्याइगु कथंया जुइगु जानकारी बिउगु दु । महानगरपालिका लागाया अप्वःथें सतकय् सतक मत मदुगुलिं लँजुवाः व सवारी साधनं समस्या फये मालाच्वंगु जक मखसे थुकिं यानाः सतक दुर्घटनात नं अप्वयाच्वंगु दु ।

 

 

सम्बन्धित बुखँ

LEAVE YOUR COMMENTS