कोशी नांविरुद्ध हाकुगु न्हि हनीगु
येँ (नेपालभाषा टाइम्स)÷ १ नम्बर प्रदेशया नां ‘कोशी प्रदेश’ तःगु विरोधय् वइगु फागुन १७ गते हाकुगु न्हिं हनीगु जूगु दु । कोशी नां खारेज यायेमाःग तयाः आन्दोलन याना वयाच्वंगु प्रदेश १ पुननामांकन संयुक्त संघर्ष समितिं म्हिगः पत्रकार सम्मेलन यासें हाकुगु न्हिं हनेगु जानकारी बिउगु खः ।
समितिं वइगु चैत १० गते तक कोशी प्रदेशया नां खारेजी व पुनः नामांकरण प्रक्रिया मन्ह्याकल धाःसा प्रदेशसभा घेराउ, मुख्यमन्त्री कार्यालय घेराउ सहित अनिश्चितकालीन हडताल यायेगु ख्याच्वः नं बिउगु दु ।
समितिं तत्कालीन केदार कार्की नेतृत्वया सरकार लिसे सहमति जुइधुंकाः शान्तिपूर्ण गतिविधि याना वयाच्वंगु खः । थ्व स्वयां न्ह्यः पहिचान पक्षधरतय्सं सार्वजनिक ज्याझ्वलय् प्रदेशसभा सांसदतय्त निषेध याना वयाच्वंगु खः । आन्दोलनया ज्याझ्वः कथं कोशी नांया पक्षय् मतदान याःपिं सांसदयात सार्वजनिक ज्याझ्वलय् ब्वति मकायेकेगु व ब्वति कायेकल धाःसा प्रतिरोध यायेगु घोषणा याःगु दु । उकथं हे प्रदेशया नां कोशी हुइगु व चीकेगु, कोशी नांया लेटर प्याड, छाप मछ्यलेत कार्यालय प्रमुख व कर्मचारीयात इनाप यायेगु व माने मजुल धाःसा स्पष्टीकरण सहित कारबाही यायेगु ख्याच्वः नं संघर्ष समितिं बिउगु दु ।
LEAVE YOUR COMMENTS