डा. अञ्जान शाक्ययात इजरायलय् ‘एम्बेसडर अफ द इयर’ अवार्ड
येँ – इजरायलया निंतिं नेपाःया राजदूत डा. अञ्जान शाक्य ‘एम्बेसडर अफ द इयर’ पाखें सम्मानित जुयादीगु दु । इजरायलया ७२क्वःगु स्वतन्त्रता दिवसया लसताय् डा. शाक्ययात ‘एम्बेसडर अफ द इयर २०१९-२०२०’ पाखें सम्मान यायेगु घोषणा याःगु खः । एम्बेसडर क्लब अफ इजरायलं राजदूत शाक्ययात उत्कृष्ट राजदूतया रुपय् उगु सम्मान बीगु निर्णय याःगु खः ।
९०गू देय्या दुतावासत दुगु इजरायलय् उगु सम्मानपाखें डा. शाक्य सम्मानित जुयादीगु खः । ९०गू देय्या राजदूतं वय्कःया पक्षय् मत बीयादीगुलिं वय्कःयात उगु सम्मानपाखें सम्मानित यायेगु घेषाणा याःगु खः । वय्कः थ्व सम्मानपाखें सम्मानित जुयादीम्ह एसियाली देय्या हे न्हापांम्ह राजदूत खः । अन आः तक युरोप व अमेरिकी देय्या राजदूततय्सं जक उगु सम्मान कायेधुंकूगु दु ।
कोरोना भाइरसाया संक्रमण जुयाच्वंगुलिं तत्काल सम्मान लःल्हायेगु ज्याझ्वः धाःसा जुइमफुनी । छुं ई लिपा छगू विशेष ज्याझ्वः यानाः राजदूत शाक्ययात सम्मान लःल्हाइगु जूगु दु । सम्मानया घोषणा लिपा राजदूत शाक्यं लसता प्वंकादिसें थ्व सम्मान नेपाः व नेपिःमतय् सम्मानया कथं कयागु धयादिल ।
‘थ्व सम्मानं नेपाः व नेपाःमितय् छ्यँ धस्वाकूगु दु ।,’ राजदूत शाक्यं धयादिल, ‘जिगु योग्यता व क्षमतां फूकथं नेपाः-इजरायल स्वपुयात थप क्वातुकेगु निंतिं विशिष्ट योगदान यानाच्वनेगु जुइ ।’
राजदूत शाक्यं थःयात सम्मानपाखें सम्मानित यायेत ग्वाहालि याःपिं ९०गू देय्या राजदूत, इजरायली सरकार, इजरायली जनता व अन दुपिं नेपिःमतय्त सुभाय् नं बियादिल ।
इजरायलया निंतिं नेपाःया राजदूत जुइधुंकाः डा. शाक्यं यानादीगु ज्याः
२०७५ फागुन ३ गते राजदूत नियुक्त जुयादीम्ह डा. शाक्यं राजदूत कथं ज्याया भालाः कायेधुंकाः नेपाः-इजरायलया स्वापुयात थप क्वतुकेगु निंतिं विशिष्ट योगदान यानाः वयाच्वनादीगु दु ।
डा. शाक्यं इजरायल व नेपाः दथुइ थीथी विषयलय् सम्झौता यानाः इजरायलपाखें नेपाःयात प्रविधि, कृषि, शिक्षा, स्वास्थ्य लगायत क्षेत्रय् ग्वाहिल यायेगु निंतं उल्लेख्य भूमिका म्हिता वयाच्वनादीगु दु ।
छुं दिं न्ह्यः जक डा. शाक्यया हे पहलय् नेपाल इजरायल चेम्वर अफ कमर्श व इजरायल चेम्बर अफ कमर्श दथुइ व्यापार व्यवसाय आदान-प्रदान यायेगु सम्बन्धी सम्झौता जूगु खः । उगु सम्झौताय् व्यापार, लगानी, उद्योग, कृषि, पर्यटन, प्रविधि, यातायात, पूर्वाधार विकास, उर्जा आदि क्षेत्रय् व्यापार व्यवसाय यायेगु कथं सम्झौता जूगु खः ।
राजदूत डा. शाक्यं ओहोदाया प्रमाणपत्र पेश यायेगु झ्वलय् हे नेपाःया न्हय्गूलिं प्रदेशय् इजरायलया ‘सेन्टर अफ एक्सिलेन्सी’ अर्थात इजरायली उच्च प्रविधिया तालिम केन्द्र चायेकेगु निंतिं इजरायलया राष्ट्रपति समक्ष प्रस्ताव तयादीगु खः । वय्कलं इजरायली उच्चप्रविधिया तालिम केन्द्र चायेकेगु व उकीया मार्फत कृषि, सूचना प्रविधि, कम्युटर, मेडिकल व शिक्षाय् थीथी एडभान्स प्रविधि लःल्हाना नेपालय् रोजगारीया अवसरया सृजना यायेफइगु बिचाः प्वंकादीगु खः ।
अथेहे डा. शाक्य राजदूत जुइ न्हयः जोर्डन व इजरायलया दथुइ व प्यालेस्टायन क्षेत्रय् लाःगु मृतसागरनापं दुगु कालिया बिच (समुद्री तट)य् ‘वर्ल्ड हाइलाइट’ धकाः च्वयातःगु होर्डिङ बोर्डय् सगरमाथा चीनय् लाःगु धकाः गलत सूचना तयातःगु खः । लिपा वय्कःया पहलय् गलत सूचना भिंकेगु ज्या जूगु खः । वय्कःया पहल आः उगु होर्डिङ बोर्डय् विश्वया सर्वोच्च शिखर सगरमाथा नेपालय् लाःगु धकाः नेपाःया ध्वाँय् सहित च्वकेगु ज्या जूगु खः ।
LEAVE YOUR COMMENTS