ने. सं. ११४४ कौलाथ्व तृतीया -

मनोहरा, नख्खु, विष्णुमति, धोवीखोला सिथय् सतर्क जुइत इनाप

येँ, यलया सुकुम्बासी बस्तिइ लः दुहां वन

येँ – म्हिगः निसें चछि न्हिछिं वयाच्वंगु वां यानाः येँ, यल व ख्वपया थीथी लागा डुबानय् लाःगु दु । थौं बागमति खुसि सिथय् सिथय् लानाच्वंगु बल्खु, टेकु, वानेश्वर, शान्तिगरया सुकुम्बासी बस्ती यक्व प्रभावित जुयाच्वंगु दु । मेखे म्हिगः हे थिमिया थीथी लागाय् डुबानय् लाःगु खः ।

जल तथा मौसम विभागं स्वनिगःया मनोहरा, बागमति, नख्खु, विष्णुमति, धोवीखोला खुसि सिथय् सिथय् च्वनाच्वंपिंत सर्तकर्ता नालेत धाःगु दु । थुपिं खुसिइ लःया बहाव अप्वयाच्वंगुलिं गाल गालय् लाःगु थाय् डुबानय् लायेफु धाःगु दु । विभागया कथं स्वनिगःया लिसें पूर्वी तराई व पश्चिमपाखे निन्हु तक अझं मदिक्क वायेफु धाःगु दु ।

मौसम पूर्वानुमान महाशाखाया मौसमविद् समिर श्रेष्ठं बुधवाः लिपा जक वाः वइगु दिइगु खँ धयादीगु दु । वय्कःया कथं थौं व कन्हय् पूर्वी तराई, मध्य व पश्चिम नेपालय् तसकं वा वइगु सम्भावना दु । महाशाखाया कथं वंगु २४ घन्टा दुने स्वनिगलय् जक ४४ मिलिमिटर वा वःगु दु ।

थौं वा वया शान्तिगरया नीखाति छेँ डुबानय् लाःगु व बल्खुया सुकुम्वासी बस्तीया निखा स्वखा छेँ डुबे जूगु खँ प्रहरीं धाःगु दु । खुसिबालं लः बजारय् दुहां वया भैसेपाटीइ च्वंगु बिगमार्ट सपिङ सेन्टरय् हे लः दुहां वंगु दु । स्थानीय प्रहरीया ग्वाहालिं सपिङ सेन्टरया सामानत चिइकेधुंकूगु खँ धाःगु दु । अथेहे यलया गोदावरी खुसि सिथय् नं डुबानया खतरा जुयाच्वंगु खँ धाःगु दु ।
ख्वपय् नं उच्च सतर्कता नालाच्वनागु खँ ख्वपया सिडियो नारायण प्रसाद भट्टं धयादीगु दु ।

म्हिगः थिमि डुबानय्

शनिवाः चान्हय् वःगु वां यानाः हनुमन्ते खुसिबाः वयाः थिमिया आपालं लागा हानं डुबानय् लाःगु दु । मध्यपुर थिमि नगरपालिकाया वडा नं. १ व ९ या आपालं लागा डुबानय् लाःगु खः ।

हनुमन्ते खुसिया थीथी सहायक खुसि बाः वयेवं अनया वस्ति डुबानय् लाःगु खः । अनया राधे राधे क्षेत्रया ७० खा छेँ डुबानय् लाःगु दुसा थुकिं यानाः छेँय् च्वंपिं मनूत पिहां वये फयाः छेँ दुने हे च्वनाच्वनेमाःगु अवस्था वःगु खँ स्थानीय वासिन्दातय्सं धाःगु दु ।

आपालं छेँया क्वय्या तल्लाय् लः दुहां वःगुलिं क्वथाय् तयातःगु दराज, टिभी, लासाफांगा थेंज्याःगु सामानया नापं व पसलय् मीत तयातःगु जाकि, बजि आदि थेंज्याःगु आपालं सामान क्षति जूगु दु ।

राधेराधे क्षेत्रया स्थानीय विद्यार्थीत आइतवाः स्कूल तकं वनेमखंसा ज्याय् वने माःपिं मनूत नं म्हिगः छेँ त्वःताः पिहां वने मफुगु अवस्था लात ।

अन दुगु थीथी स्कूलया लिसें होटल व रेष्टुरेन्ट तकं म्हिगः बन्द जूगु खः । अथेहे यातायात कार्यालयं राधे राधे क्षेत्रय् सञ्चालन याना वयाच्वंगु सवारी अनुमतिपत्रया प्रयोगात्मक परीक्षा तकं म्हिगः बन्द जूगु खः ।

खुसिया जग्गा अतिक्रमण यानाः छेँ दयेकूगुलिं भचा तसकं वा वल धाःसां नं उगु लागाय् खुसिबाः वयाः समस्या जुयाच्वंगु खँ सम्बन्धित विज्ञतय्सं धाःगु दु ।

खुसिबाः वयाः हनुमन्ते खुसिया ताँ नं भासे जूगु दु । म्हिगः प्रमुख जिल्ला अधिकारी सहित वयाः क्षति जूगु ताँ अवलोकन यायेगु लिसें ताँ बचे यायेत माःगु ज्या याःगु खः । ताँ भासें जूसां नं सवारी आवागमनय् धाःसा छुं कथंया पंगः मवःगु खँ धाःगु दु ।

म्हीग वःगु खुसिबालं हुनमानघाटय् च्वंगु परोपकार केन्द्र, वया जःखः च्वंगु छेँ, सिद्धि स्मृति बाल अस्पताल, राममन्दिर, शान्ति निकेतन मावि, डा. इवामुरा अस्पताल, अक्सफोर्ड स्कूल डुबानय् लाःगु खः ।

शनिवाः चान्हय् खुसिबाः वयेवं स्थानीय प्रशासनं प्रहरीयात तयारी अवस्थाय् च्वनेत निर्देशन बिउगु खँ प्रहरी परिसर ख्वपया प्रमुख प्रहरी उपरीक्षक हिमालयकुमार श्रेष्ठ कनादिल । थ्व स्वयां न्ह्यः वंगु असार २८ गते वःगु खुसिबालं यानाः अनया छेँया छतँ जायेक लः दुहां वंगु खःसा अबले नं आपालं सामान नष्ट जूगु खः ।