ने. सं. ११४४ चौलाथ्व द्वादशी -

गुथिया अवधारणा मन्त्रीयात लःल्हात

येँ – विधेयकयात कयाः वयाच्वंगु विवादया झ्वलय् म्हिगः नेवाःतय् पाखें भूमिसुधार मन्त्री पद्मा अर्यालयात थःपिनि लिखित अवधारणा न्ह्यब्वयेगु ज्या जुल । गुथि विधेयक विरुद्ध एकीकृत आन्दोलनपाखें म्हिगः मन्त्रालयय् वनाः आन्दोलनया नायः डा. महेशमान श्रेष्ठं थःपिनि अवधारणा ब्वनाः न्यंकादीगु खः ।

नेवाःतय्पाखें बिउगु उगु लिखित अवधारणाय् नेवाःतय्गु गुथि व्यवस्थायात स्वतन्त्रता व स्वायत्तता प्रदान यायेमाःगु व कानूनय् स्वनिगःया गुथि व्यवस्थाया लागिं बिस्कं हे व्यवस्था जुइमाःगु आधारभूत खँ दुथ्याकातःगु दु । लिसें सरकारं भूमि, संस्कृति सम्बन्धी मेमेगु कानून दयेकीबलय् नं नेवाःतय्गु गुथियात प्रभावित याइगु छुं कथंया प्रावधान तये मदइगु खँय् नं सचेत याःगु खः ।

गुथि सम्बन्धी खँयात कयाः नेवाःतय्पाखें सरकारयात बिउगु थ्वहे न्हापांगु लिखित अवधारणा खः । मन्त्री अर्यालं अवधारणा लःल्हाना कासें उकियात थःपिंसं सकारात्मक रुपं कयागु खँ कनादिल । लिसें वय्कलं गुथिलिसे स्वाःगु विधेयकयात अन्तिम बीगु लागिं हानं नं सल्लाह यायेगु बचं नं बियादिल ।

भूमिसुधार मन्त्रीं म्हिगः मेमेपिं नं मनूतय्त गुथि विधेयक बारे सहलह यायेत सःतातःगु खः । उगु इलय् मेमेगु नं थीथी नेवाः खलः पुचःतय्सं एकीकृत आन्दोलनपाखें न्ह्यब्वःगु अवधारणायात समर्थन यासें सरकारं वहे अनुरुप विधेयक दयेकेमाःगु खँय् बः बिउगु खः ।
थ्व स्वयां न्ह्यः गुथि विधेयक विरुद्धया एकीकृत आन्दोलनं थीथी चरणय् सहलह व अन्तक्र्रिया यासें नेवाःतय् उगु मंकाः अवधारणा तयार याःगु खः । थ्वहे नेवाःतय् गुथिया ‘बटम लाइन’ खः धाःगु दु ।