४५ म्ह दाफा गुरुपिं हनेज्या

येँ ( येँ महानगर पालिकाया प्रमुख विद्यासुन्दर शाक्यं पीन्याम्ह दाफा गुरुपिंत छगू ज्याझ्वःया दथुइ हनेज्या यानादीगु दु । येँ महानगर प्रमुख शाक्यं वंगु शुक्रवाः थनया नेपाः ब्यांक्वेटय् जूगु छगू ज्याझ्वःया दथुइ २७ क्वःगु महानगर दिवसया लसताय् येँ महानगरया पीन्याम्ह दाफा गुरुपिंत हनेज्या यानादीगु खः ।

ज्याझ्वलय् नवासें वय्कलं महानगर दुनेया सामाजिक व सांस्कृतिक जीवननाप सम्बन्धित मूर्त अमूर्त सम्पदा संरक्षण व प्रवद्र्धनया निंतिं राज्यपाखें महानगरं लगानी याना वयाच्वंगु दु धयादिल ।
जीवित देवीकथं झीसं अतिकं आस्था तयातइपिं वर्तमान कुमारि, गणेश व भैरव जक मखु, पुलांपिं कुमारि, गणेश व भैरवयात नं महानगरपाखें लय्पतिकं भत्ताया व्यवस्था याना वयाच्वनागु जानकारी बियादिसें ‘मेगु पेशा याये मफुतकि जीवन व छेँ व्यवहार हनेत थाकुइगु जक मखु थःगु कुल परम्पराप्रति नं आकर्षण म्हो जुया वनी’ वय्कलं धयादिल, ‘थुकिया आकर्षण ल्यंका तयेत हे गुम्हेसिनं परम्परागत संस्करयात निरन्तरता बिया वयाच्वनी, इमित भत्ताया व्यवस्था यानागु खः ।’

येँ मपा १८ वडाअध्यक्ष नापं सम्पदा पर्यटन समितिया संयोजक न्हुछेकाजी महर्जनं सांस्कृतिक म्हसीकायात ल्यंका तयेगु ज्यायात महानगरं प्राथमिकता बिया वयाच्वंगु खँ कनादिल ।
ज्याझ्वलय् राजभाई ज्यापु, ज्योति शाक्यलिसें थीथी व्यक्तित्वपिंसं नं थःथःगु नुगःखँ तयादीगु खः ।