स्थिति खराब जूसा उद्धार यायेगु सेनाया तयारी

येँ – कोरोनाया संक्रमण पनेगु लागिं सरकारं लकडाउन यानातयाः नं यदि स्थिति नियन्त्रणं पिहां वन धाःसा सेनायात क्वत हयेगु तयारी यानाच्वंगु खँ सीदुगु दु ।

थुकिया लागिं नेपाली सेनां आन्तरिक रुपं माःगु तयारी यानाच्वंगु दुसा थौं विहीवाः सुथय् थुकिया बारे महानगरपालिकाया जनप्रतिनिधिपिंलिसे सहलह समेत याःगु खँ नं सीदुगु दु ।

कोरोनाया संक्रमण तच्वया वनाः यदि मनू सीगु थ्यंकया अवस्था पिहां वल धाःसा अज्याःगु इलय् सेनायात मैदानय् क्वकायेगु रणनीति सरकारं दयेकाच्वंगु दु । लिसें नेपाली सेनां नं उकथंया हे तयारी यानाच्वंगु खँ सीदुगु दु ।

थुकिया लागिं सेनां मनू सित धाःसा संक्रमण मेथाय् न्यना वने मफयेक सीम्ह प्वः चीगु विशेष कथंया प्लास्टिकया तयार याःगु दु । लिसें ‘अपरेशन’ या लिसें सुं मनू न्ह्यःने वल धाःसा वयात न्हापां वासः छ्वाकाः जक सम्पर्कय् वनेगु लागिं स्प्रे नं तयार यानातःगु दु ।

स्थिति खराब जुया वंगु अवस्थाय् सेनायात क्वत हयेगु नीति सरकारं काःगुलिं सेनां नं आन्तरिक रुपं उकिया तयारी याःगु खँ सूत्रं धाःगु दु ।

(ने. सं. ११४० चाैलाथ्व द्वितीया / वि. सं २०७६ चैत १३, बिहिवाः)