‘स्वनिगःया नेवाः’ पितब्वज्या

येँ – गायिका गंगा महर्जनया याकः सलय् दुगु म्येचाः ‘स्वनिगःया नेवाः’ विमोचन जूगु दु । जनकवि दुर्गालाल श्रेष्ठ मू पाहाँ कथं झायादीगु ज्याझ्वलय् येँ महानगरपालिकाया मेयर विद्या सुन्दर शाक्य, वरिष्ठ संगीतकःमि दीपक जंगम विशेष पाहाँ कथं झायादीगु खः ।
न्यापु म्येँ दुथ्याःगु थुगु म्येँचाःया फुक्कं म्येँ लोककवि राजभाई जकःमिं च्वयादीगु खःसा राजु सिंहं संगीत तयादीगु खः, अथेहे जंगल डंगोलं संगीत संयोजन यानादीगु खः ।

ज्याझ्वलय् न्ववानादिसें जनकवि दुर्गालाल श्रेष्ठं नेवाः भाय्या म्येँया बजाः सीमित जूसां गायिका मय्जुं याकनं हे निगूगु म्यँेँचाः पितबिउगु खँय् लसता प्वंकादिल । अथेहे संगीतकःमि जंगंमं नेवाः भाय्या संगीत नेपाली संगीतया हे अमूल्य निधि जूगु खँ धयादिसें थुकिं नेपाली संगीतयात च्वन्ह्याकेत नं विशेष भूमिका म्हितूगु खँ कनादिल । नेवाः संगीत थीथी ऋतु म्ये, ग्वारा, ताल नेपाःया हे गौरव व उत्कृष्ट जूगु खँ वय्कलं धयादीगु खः । अथेहे विशेष पाहाँ मेयर शाक्यं सर्जकतय्सं मेहनत यानाः हःगु सफू जुइमा वा म्येँचाः जुइमाः, उकियात सितिकं कायेगु मखुसे उमित प्रोत्साहित यायेत न्यानाः कायेगु यायेमाःगु खँ धयादिल ।

ज्याझ्वलय् थुगु म्येँचाः पिकायेत ग्वाहालि यानादीपिंत मतिनाया चिं लःल्हासें सम्मान नं याःगु खः ।