क्यानाडाय् यःमरि पुन्हिलिसें नारायणगोपाल साँझ

येँ(नेपालभाषा टाइम्स)- क्यानाडाय् च्वंपिं नेवाःतय्सं यःमरि पुन्हि हनेगु नापं स्वर सम्राट नारायणगोाल गुरुवाचार्ययात नं लुमंकूगु दु । क्यानेडियन नेवाः गुथिं थुगुसी थिंलाथ्व पुन्हिया लसताय् ग्वसाः ग्वःगु यःमरि पुन्हि ज्याझ्वलय् नारायणगोपाल साँझ ज्याझ्वः नं याःगु खः ।

गुथिया नायः प्रकाश प्रधानया सभापतित्वय् न्ह्याःगु ज्याझ्वलय् वय्कलं यःमरि पुन्हिया महत्वया बारे जानकारी बियादीगु खः । गुथिया न्वकु उत्तम माकःजुं यःमरि मौसमकथंया छताजि विशेष प्रकारया नेवाः नसा जूगु जानकारी बियादिल । लिसें वय्कलं यःमरि पौष्टिकतां जाःगु नापं नेवाः संस्कारय् मचा प्वाथय् दुगु इलंनिसें ज्याःजंक्वया इलय् तकं छ्यलाबुलाय् वयाच्वंगुलिं थुकिया विशेष महत्व दुगु नापं थुकिं सामाजिक महत्वयात पिब्वयाच्वंगु खँ कनादिल । यःमरि दयेकेबलय् खालि यःमरि जक दयेकीगु मखसे उकिया नापनापं गणेद्यः, छुँ, मनूया आकृतिइ मायःबायः दयेकेगु चलन नं दुगु व थुकिं मस्तय्त नं शिक्षा बीगुकथं प्रतिविम्बित यानाच्वंगु दु धयादिल ।

मूछ्याञ्जे विमल श्रेष्ठं कोरोना महामारीया कारणं वंगु निदँ थुखे प्रत्यक्ष रुपं हने मखनाच्वंगु यःमरि पुन्हिया ज्याझ्वः थुगुसी सकलें छगू हे थासय् मुनाः हने खंगुलिं तसकं लय्ताःगु खँ कनादिल ।
गुथिया ज्यासना पुचःया दुजः डा. कृष्ण कायस्थं यःमरि पुन्हि व ज्यापु दिवसयात कयाः चिनादीगु चिनाखँ ब्वनाः न्यंकादीगु ज्याझ्वलय् मिसा पुचःया कजि रञ्जना सैंजू व लिउ दांभरिं चन्दा श्रेष्ठं गुथिया मिसा दुजःपिनिगु निंतिं अनलाइन हुलाप्याखंया प्रशिक्षण न्ह्याकेत्यनागु बारे जानकारी बियादीगु खः ।

गुथिया संस्कृति सचिव सुरेन्द्रलाल श्रेष्ठं सुभाय् देछासे आकिवंनिसें वृहत रुपं यःमरि पुन्हिया ज्याझ्वः यायेगु बारे जानकारी बियादीगु खः ।

उगु इलय् मिसा पुचःया दुजःपिंसं यःमरि दयेकेगु विधिया बारे ब्वज्या नं यानादीगु खःसा निगूगु चरणय् स्वर सम्राट नारायणगोपाल गुरुवाचार्यया लुमन्तिइ वय्कलं सांगीतिक ख्यलय् बियादीगु योगदानयात कयाः चर्चा नं याःगु खः। नापं ज्याझ्वलय् प्रकाश प्रधान, उत्तम माकःजु, बिमल श्रेष्ठ, सुमन राजवंशी, सुरेन्द्र श्रेष्ठ, गीता पन्त, सबिना शाक्य, रञ्जना सैंजू अरुणा प्रधान, राजेन्द्र महर्जन, गोबिन्द घिमिरे, शिब कारञ्जित, नरेश ताम्राकारपिंसं नारायणगोपालयालिसें नेपालभाषाया म्येँ न्यंकादीगु खः ।