ने. सं. ११४४ कछलागा तृतीया -

लुसिइ जुइगु फंगस इन्फेक्सन

म्हया सौन्दर्यया निंतिं ल्हाः तुति बांलाकेगु जरुरी जुइ । तर उकिया आकर्षणया निंतिं लुसियात नं ल्वय् मजूगु, गुलाफि व चमक दुगु दयेकातयेमाः । रंग वंगु, बेबेक्वःगु व त्वःत्वःधूगु लुसि स्वयेबलय् भद्दा खनेदइगु ला जु हे जुल, थुकिया लिसें थुकिं ल्हाः तुतिया सुन्दरतायात चौपट यानाबी ।

अथे जूगुलिं लुसियात फंगस इन्फेक्सन, चोट, दबाब आदिपाखें बचे यायेमाः । लुसिइ छक्वः ल्वचं कये धुंकल कि उपचार याःसां लंकेत भचा यक्व ई काइ । गबलें गबलें म्हय जूगु मेगु हे छुं ल्वय्या कारणं नं लुसि स्यनेयः । अथे जुइबलय् उगु ल्वय्या वासः यायेगु निं आवश्यक जुइ । छुं छुं छ्यंगूया ल्वय् जुइबलय् नं लुसि बांमलाना वनेयः ।

थ्व बाहेक गबलें गबलें चोट लानाः नं लुसिया रंग व आकार हिला वनेयः । छेँज्या यायेमाःपिं मिसातय्त लुसिइ फंगस इन्फेक्सन जुइगु सम्भावना अप्वः दइ । वसः हिइलबय् ल्हाः प्याइगु जुयाः लुसिया सतह नाइसे च्वनाः कमजोर जुयावनी । थुकिं यानाः ल्वय्या संक्रमण जुइफु । अथे जुयाः घरेलु मिसातय्सं थःपिनिगु लुसिया सुसाःकुसालय् विशेष ध्यान बीमा ।

लुसि स्यनीगु, रंग वनीगु अथवा फंगस जुइगु स्वता कारण दु १) लुसिया इन्फेक्सन २) छ्यंंगू ल्वय् वा मेमेगु शारीरिक ल्वय् ३) चोट लानाः ज्यलीगु व दबाब लाइगु ।

लुसिइ फंगस मजुइकेत
लुसिइ हमला याइपिं रोगाणुतय्त फंगस धाइ । थुपिं तःता कथंयापिं दु । अप्वः थें मामलाय् फंगस पाखें हे लुसिइ नोक्सान जुइकाबी । लुसिइ फंगस इन्फेक्सन निगू कथंया दु – पेरोनाइकिया व लुसिया दाद (रिंगवर्म)

पेरोनाइकिया
थुगु ल्वय् पिकाइम्ह फंगस लुसि बांलाक सफा मयातकि दाइगु खः । थज्याःगु कथंया इन्फेक्सन गृहिणीतय्त अप्वः थें जुइ । कारण थ्व खः कि वसः हिइगु झ्वलय् लुसि प्यानाच्वनीगु ला जु हे जुल, लिसें उकी साब्वं, डिटर्जेन्ट इत्यादि नं लाना च्वनी । थुकिं यानाः लुसिया द्यःनेया सतह, गुकियात क्यूटिकल धाइगु खः, उकियात कमजोर यानाबी ।

अले गुगुं गुगुं थासय् व चिरिबाइगु नं जुइ । थुकिं यानाः ल्वय् पिकाइगु फंगस दुहां वनेत अःपुइ । गबलें गबलें चोट लानाः लुसि त्वःधुलाः नं लुसिइ फंगस इन्फेक्सन जुइ । थ्व ल्वचय् लुसिया प्यखेरंया टिश्यूलय् मनावइ । थ्व छुं महिनानिसें दं दं तक नं ल्यनाच्वनेफु । मना वयेगुया लिसें स्याना नं वइ । अले गबलें गबलें ला लुसिया तःलय् तःलय् न्हि नं दायावइ ।

थ्व अवस्थाय् उपचार मयात धाःसा झन अप्वः सास्ति जुइ । थुगु ल्वचय् लुसिइ आकार स्यनावनी, रंग हिलावनेगु व चमक मदयावनेगु जूगुलिं लुसि भद्दा खनेदइ । पेरोनाइकियाया उपचार पूवंक हे सम्भव दु । अथे जुयाः इन्फेक्सन जुइवं हे योग्य डाक्टर क्यनाः उपचार यायेमाः ।

लुसिइ दाद
थ्व इन्फेक्सन नं फंगसपाखें हे जुइगु खः । थ्व इन्फेक्सन सामान्यतयाः तुतियागु बुरापतिनय् जुइ । तर थ्व दक्वं मामिलाय् जरुरी मजू । थ्व ल्हाः तुतिया पतिंया लुसिइ नं जुइफु । फंगस लुसिया तःलय्या सतहय् दयावइ, अले बुलुहुं बुलुहुं लुसिया रंग सिइसे च्वनावनी, फ्वःफ्वः धाइ, ख्वातुयाः चाराचारा वंक तज्यानावइ । थथे जुइबलय् न्ह्यःनेया भाग त्वःत्वःधुलावनी । थ्व ल्वय्या उपचार नं सम्भव जू । नयेगु व पायेगु वासलं बांलाक ज्या याइ ।