‘यतियात आक्रमणं भ्रमण वर्ष स्यनेफु’

येँ -हिमाली पर्यटनया ख्यलय् नांजाःगु यति समहूयात थौंकन्हय् सञ्चार माध्यमतय्सं लगातार आक्रमण यानाः च्वया हयाच्वंगु खँयात कयाः नेपाल पर्वतारोहण संघं दुःख प्वंकूगु दु । यति समूह थेंज्याःगु पर्यटन व्यवसायिक प्रतिष्ठानयात थुकथं बदनाम यायेगु कथं ज्या जुयाच्वन धाःसा न्ह्यःने वयाच्वंगु नेपाल भ्रमण वर्ष समेत असफल जुइ फइगु ख्याच्वः तकं संघं बिउगु दु ।

नेपाःया पर्वतीय पर्यटन व्यवसाययात विश्वव्यापी रुपं प्रचार यासें थुकियात स्थापित यायेगु ज्याय् यति समूहया तःधंगु योगदान दु धासें अज्याःगु व्यावसायिक संस्थायात बदनाम यायेत छुं प्रमाण बिना लगातार आक्रमण याना हयाच्वंगुलिं थुकिं यानाः २० लाख पर्यटक दुकायेगु लक्ष्य तयाः न्ह्यःने हयाच्वंगु नेपाल भ्रमण वर्ष समेत प्रभावित जुयाः लक्ष्य असफल जुइ फइगु ख्याच्वः संघं बिउगु खः । संघया अध्यक्ष शन्तवीर लामां छगू वक्तव्य जारी यासें थ्व खँ न्ह्यथंगु खः ।

वंगु छुं ई न्ह्यवंनिसें नेपाःया थीथी सञ्चार माध्यमतय्सं सरकारी जग्गा अतिक्रमण यानाः यति समूहं व्यवसाय सञ्चालन लानाच्वंगु धासें उकिया सञ्चालकतय्गु बारे समाचार च्वयेगु याना हयाच्वंगु खः ।