राष्ट्रिय श्रम तथा रोजगार सम्मेलन न्ह्यात

येँ – स्वदेशय् हे रोजगारी सिर्जना यानाः ल्याय्म्हतय्त देय् आर्थिक, सामाजिक व भौतिक विकासया ल्याय् लगे यायेगु ताः तयाः राष्ट्रिय श्रम
तथा रोजगार सम्मेलन २०७६ सुरु जूगु दु । श्रम, रोजगार तथा सामाजिक सुरक्षा मन्त्रालयया ग्वासालय् जूगु थ्व सम्मेलन प्रधानमन्त्री केपी शर्मा ओलीं आइतवाः उलेज्या यानादिल ।

आन्तरिक श्रमय् ल्याय्म्हतय् आकर्षण अप्वयेकेगु, श्रम सम्बन्ध सुदृढ यायेगु, श्रम तथा रोजगारीया न्हूगु व सिर्जनात्मक पक्षयात पिब्वयेगु ताः तयाः थ्व सम्मेलन ग्वसाः ग्वयागु खँ धाःगु दु ।

निन्हुयंकं जुइगु थ्व सम्मेलनय् श्रम तथा रोजगार क्षेत्रय् सरकारं छीमाःगु पलाः, दयेकेमाःगु ऐन कानुन, नीति लगायतया विषयय् सहलह जुइ । श्रम रोजगार क्षेत्रया चुनौति, रोजगारी व सीपया सम्भाव्य क्षेत्रया पहिचान यायेगु विषयय् सहलह जुइगु खँ श्रम मन्त्रालयं धाःगु दु ।

सम्मेलनया न्हापांगु न्हि आइतवाःकुन्हु श्रम तथा रोजगार सम्बन्धी नीति पुनरावलोकनया पक्ष, श्रम, आप्रवासन व विदेशं लिहां वःपिं ल्याय्म्हतय् पुनः एकीकरण व ज्याया भविष्यया सम्बन्धय् थ्व क्षेत्रया विज्ञपिंसं ज्यापौ न्ह्यब्वःगु दु ।

अथेहे सोमवाः नेपाली श्रम बजाः व आय स्थितिया सिंहावलोकन, कार्य संस्कृति व श्रम मर्यादा, नेपालय् युवा उद्यमशीलता, रोजगारी व सूचना प्रविधि, श्रम उत्पादनशीलता, राष्ट्रिय अर्थतन्त्र व रोजगारीया निंतिं सीप विकास विषयय् मंकाः सहलह जुइ ।सम्मेलनपाखें चूलाःगु सुझावया आधारय् श्रम तथा रोजगार क्षेत्रय् थप रणनीतिक कार्यक्रम संचालन यायेत ग्वाहालि जुइगु सरकारया विश्वास दु ।