भदौ २६ निसें अटोमोबाइल शो

येँ – देशय् थीथी ताजिया सवारीसाधन (अटो मोबाइल्स)या जक न्यागू खर्ब तका बराबरया कारोवार जुइगु जुयाच्वंगु दु । नेपाल अटो मोबाइल्स डिलर्स संघं मंगलवाः निसें सुरु जुइगु थ्व दँया नाडा अटो सोया बारे जानकारी बीत याःगु ज्याझ्वलय् दँय्दसं न्हूगु ब्राण्डया निचाः घःचाः दुगु व प्यचाः घःचाः दुगु लिसें तग्वःगु सवारी साधनया कारोवार अप्वया वनाच्वंगु खँ धाःगु दु ।

थ्वहे वइगु भदौ २६ निसें ३१ गते तक येँया भृकुटी मण्डपय् अटो शो जुइत्यंगु दु । ज्याझ्वलय् संघया कार्यवाहक अध्यक्ष कृष्णप्रसाद दुलालं थ्व क्षेत्रया कूल गार्हस्थ उत्पादनय् वार्षिक थ्यंमथ्यं २५ प्रतिशत योगदान बियाच्वंगु जानकारी बियादिल । वय्कलं दँय्दसं जुया वयाच्वंगु अटो मोबाल्स प्रदर्शनीइ थीथी कम्पनीया ७१ गू विक्री कक्ष दइगु खँ नं कनादिल ।

संघया महासचिव सुनिल रिजालं देय्या पूर्वाधार विकास व उपभोक्तातय् आम्दानी अप्वयेके फत धाःसा स्वदेशय् नं अटोमोबाइल्स क्षेत्रया उत्पादन यायेफइगु विश्वास नं प्वंकादिल । थुगुसी थ्यंमथ्यं ६० हजार दर्शकं अटो शो स्वःवइगु अनुमान यानातःगु दुसा थुकी थीथी ब्रान्डया न्हूगु मोडलया गाडी प्रदर्शनी जुइगु खँ धाःगु दु । देशय् चले जुयाच्वंगु फुक्क कथंया गाडीया ब्राण्ड थुगु अटो शोलय् सहभागी दइगु खँ नं धाःगु दु ।