बौद्ध दर्शनया शिक्षार्थीपिंत दसिपौ
येँ -महायान बौद्ध समाजया ग्वसालय् जूगु महायान, वज्रयान बौद्ध धर्म दर्शनया प्रारम्भिक तह कक्षाय् ब्वति काःपिंत वंगु शनिवाः छगू ज्याझ्वःया दथुइ दसिपौ लःल्हाःगु दु । समाजया नायःलिसें प्रशिक्षक बौद्ध विदुषि सुमति वज्राचार्यया सभापतित्वय् जूगु समापन ज्याझ्वलय् धर्मोदय सभाया नायःलिसें बौद्ध विद्वान यज्ञमानपति वज्राचार्य मूपाहांकथं बिज्याःगु खm ।
ज्याझ्वलय् मूपाहां वज्राचार्यं कक्षाय् न्हाप जुयादीम्ह प्रभात किरण वज्राचार्य, लिउ विजयश्रीरत्न वज्राचार्य व लियांलिउ जुयादीम्ह सुगतरत्न सिन्दुराकारलिसें मेपिं सहभागि शिक्षार्थीपिंत दसिपौ लःल्हानादीगु खः । अथे हे बौद्ध विद्वान प्रा. डा. नरेशमान वज्राचार्यं उत्कृष्ट शिक्षार्थीपिंत दां लःल्हानादीगु खः । निलायंकं न्ह्याःगु कक्षाय् झिंखुम्हेसिनं ब्वति कयादीगु खः ।
न्ह्यःने वयाच्वंगु राष्ट्रिय जनगणनाय् बौद्धतय्गु विषयवस्तुइ केन्द्रीत जुयाः थःगु नुगःखँ तयादीसें मूपाहां वज्राचार्यं सकल बौद्ध धर्मावलम्बितसें जनगणनाय् तसकं विचाः यानाः बौद्ध धर्म हे च्वकेमाःगु खँय् बः बियाबिज्यात ।
विशेष पाहां प्रा. डा. वज्राचार्यं शिक्षा हासिल यायेगु ज्यायात निरन्तरता बिया वना च्वनेमाःगु खँय् बः बियाबिज्यासें थम्हं सयेके सीके यानागु ज्ञानयात लिपा लिपा नं ब्वना वनाच्वनेगु यायेमाः धयाबिज्यात ।
समाजया छ्याञ्जे रविन्द्र वज्राचार्यं लसकुस यानादीगु ज्याझ्वलय् राजेश वज्राचार्य, सुरेन्द्र वज्राचार्य व सागर वज्राचार्यं स्वस्ति वाचन यानादीगु खःसा शिक्षार्थीपाखें सुगतरत्न सिन्दुराकारं नं थःगु नुगःखँ तयादीगु खः ।
ज्याझ्वलय् राजगुरुजु मञ्जुश्रीरत्न वज्राचार्य, वज्राचार्य संरक्षण गुथिया न्वकु सागरमान वज्राचार्य, छ्याञ्जे मुनिन्द्ररत्न वज्राचार्य, राजेन्द्रमान वज्राचार्य लगायतया उपस्थिति दुगु खः ।
LEAVE YOUR COMMENTS