राजधानी जुइवं क्वथाया भाः थहां वन

येँ – नम्बर ५ या राजधानी घोषणा जुइवं बुटवलय् क्वथाया बाः ह्वात्त हे थहां वंगु दु । भुक्तभोगीतय्सं धाः कथं थौंकन्हय् अन क्वथाया भाः न्हापा स्वयां करिब ७५ प्रतिशत धइथें थहां वंगु खनेदु ।क्वथाया भाः आकाझाकां थहां वंगुलिं बुटवलय् प्रदेससभा व सरकारया ज्याय् खटे जुयाः वःपिं कर्मचारीत थारा न्हुयाच्वंगु दु । सरकारी ज्या याये धकाः वयेधुंकाः बुटवलय् थहां वंगु क्वथाया भाः खनाः फस्र्ट क्लास अफिसरत तकं छु याये छु याये जूगु खँ धाःगु दु । अन थ्यंपिं सरकारी कर्मचारीतय्सं धाः कथं थौंकन्हय् बुटवलय् छतँया भाः १७ निसें १८ हजार तका थ्यनाच्वंगु दु । व नं कायेत थाकुगु अवस्था दु ।

थथे क्वथाया भाः थहां वंगुलिं थुकिया लिच्वः आः मेमेगु थासय् नं लाये फइगु खँ धयाहःगु दु । खास यानाः थुकिं यानाः बुटवलय् बजाः भाः थहां वनीगु खतरा दु । अथे जुल धाःसा बुटवलय् सर्वसाधारण मनूत च्वने फइगु अवस्था मदयेफु ।५ नम्बर प्रदेशया राजधानी दाङय् तयेगु प्रस्ताव वःबलय् बुटवलया नेता व स्थानीय मनूतय्सं आन्दोलन यानाः राजधानी थःथाय् तयेके बिउगु खः । मनूतय्सं क्वथाया भाः थकाःगुलिं अनया स्थानीय निकायया पदाधिकारी–तय्सं क्वथाया भाः थकाये मते धकाः छेँथुवाःतय् इनाप यानाच्वंगु दु । यदि थथे जुल धाःसा बुटवलया अवसर गुमे जुइफु धकाः नं उमिसं ख्याच्वः बियाच्वंगु दु ।