ठमेलय् तार चीकूथाय् इन्टरनेट विवाद

येँ – ठमेलय् गुजुमुजु जुयाच्वंगु तार चीकेगु अभियान न्ह्याकेवं विवाद जूगु दु । इन्टरनेट सेवा प्रदायक कम्पनीतय्सं आकाझाकां तार चाःगुलिं करोडौंया क्षति जूगु धासें प्रहरीइ उजुरी तयेगु तयारी याःगु खँ सीदुगु दु । ठमेल पर्यटन विकास परिषद्या ग्वसालय् पोलय् खायातःगु इन्टरनेट व टेलिफोनया तार चानाः उकियात व्यवस्थित यायेगु कथं ज्या न्ह्याकूगु खः । लाथेपाथे तार सालातःगुलिं शहरया सौन्दर्य बांमलाःगु धासें परिषदं उकियात व्यवस्थित यायेत स्वःगु खः । तर इन्टरनेट प्रदायक संघं थःपिं लिसे समन्वय मयासे तार चायेगु ज्या याःगुलिं न्यागू करोड तकाया नोक्सान जूगु दावी याःगु दु । संघं थौं प्रहरीइ उजुरी दर्ता यायेगु खँ धाःगु दु ।

तार चाःगु विषययात कयाः संघं विरोध याःसां नं स्थानीय जनतां धाःसा थुकियात समर्थन याःगु दु । थीथी पोलय् प्वाँयप्वाँय् तार दुगुलिं गुगुं नं इलय् दुर्घटना जुइ फइ धासें तार चानाः व्यवस्थित यायेगु ज्याय् थःपिनिगु समर्थन दुगु खँ धाःगु दु । स्थानीय वासिन्दां इन्टरनेट सेवा प्रदायक संस्थातय्सं लाथेपाथे तार सालेगु ज्या यानाच्वंगुलिं गुलिखे थासय् तार सर्ट जुयाः मिं नयेगु ज्या समेत जुयाच्वंगु दु धासें उकियात व्यवस्थित यायेमाःगु खँ धाःगु दु ।

लिसें स्थानीय जनतां थँबही लागाय् तार जाः जुयाच्वंगुलिं थुकिं यानाः गुगुं नं इलय् दुर्घटना जुइफइगु सम्भावना दु धासें उकियात व्यवस्थित यायेत परिषदं न्ह्याकूगु ज्या उचित जूगु खँ धाःगु दु । तार चाःगु विषयसं थीथी वडां नं ग्वाहालि यानाच्वंगु दु । येँ महानगरपालिकां येँय् बिजुलीया तार व इन्टरनेट सेवा बीगु तारया कारणं स्वनिगः हे कुरुप जूगु धासें उकियात व्यवस्थित यायेगु अभियान न्ह्याकाच्वंगु दु ।

परिषदं पर्यटन वर्ष २०२० यात ध्यानय् तयाः नं अस्तव्यस्त रुपं सालातःगु तार चायेगु ज्या जुयाच्वंगु खँ धाःगु दु । परिषदया कथं पोलय् सालातःगु ९५ प्रतिशत तारं ज्या बियाच्वंगु मदु ।

सम्बन्धित बुखँ

LEAVE YOUR COMMENTS