तुलाधरया लुमन्ति गोष्ठी

येँ- नेवाः आन्दोलनलिसें आदिवासी जनजाति, मानव अधिकार आन्दोलनया न्ह्यलुवाः पद्मरत्न तुलाधर मदुगु दछि क्यंगु लुमंतिइ थीथी ज्याझ्वः जुल । थ्व झ्वलय् वंगु शुक्रवाः पद्मरत्न लुमन्ति गुथिपाखें छगू लुमन्ति मुँज्या यात । गुथिया नायः डा. केशवमान शाक्यया सभापतित्वय् जूगु उगु ज्याझ्वलय् न्ववासें नेकपा सांसद कृष्णगोपाल श्रेष्ठ २०४३ सालय् पञ्चायत विरुद्धया चुनावय् थनेगु लागिं पद्मरत्नयात थःपिंसं छैमलेया छगु गामय् तत्कालीन मालेया अध्यक्ष झलनाथ खनाल नापलाके यंकागु खँ कनादिल ।

अबले वय्कलं चुनाव ल्वाये मखु धयाच्वंगु खःसां नेता खनालं चुनाव ल्वायेत सहमत याके बिउगु प्रशंग वय्कलं अन न्ह्यथनादिल । राजनीतिक विश्लेषक श्याम श्रेष्ठं जुजु ज्ञानेन्द्रया निरंकुश शासन विरुद्ध नागरिक समाजं आन्दोलन याःबलय् पद्मरत्नं कफ्र्यु तोडे यानाः पिहां वनेगु धकाः आँट यायेवं मेपिंसं नं वय्कलं थें आँट पिकाःगु खँ कनादिल ।

साहित्यकार भूषणप्रसाद श्रेष्ठं तुलाधरं नेपालभाषा साहित्य ख्यलय् यानादीगु योगदानया चर्चा यानादिल । मदुम्ह तुलाधरया म्ह्याय् सुम्निमा तुलाधरं थः बौया शब्दकोशय् शत्रु व मयःम्ह मनू धइगु खँग्वः तक हे मदुगु चर्चा यानादिल ।
गुथिया नायः डा. केशवमान शाक्यया सभापतित्वय् जूगु उगु ज्याझ्वलय् छ्यांज्ये नरेशवीर शाक्यं नं नुगःखँ प्वंकादीगु खः ।