पारसया कप्तानीपाखें राजीनामा
येँ – नेपाली राष्ट्रिय क्रिकेटया कप्तान पारस खड्कां थःगु पदं राजीनामा बियादीगु दु । वय्कलं थःगु थ्व राजीनामा आकाझाकां वःगु मखसे सोचबिचाः यानाः हे बियागु खँ धाःगु दु । खड्कां मंगलवाः सामाजिक सञ्जाल पाखें थःम्हं कप्तान पदं राजीनामा बियागु घोषणा याःगु खः । थ्व घोषणा लिपा पत्रकारतलिसे खँ ल्हासें वय्कलं धयादीगु दु, ‘जिं झिदँ दत कप्तानी यानाच्वनागु, विगतया इलय् गुकथं क्रिकेट न्ह्याः वनाच्वंगु दु, व स्वयां जिं राजीनामा यायेगु निर्णय यानागु खः ।’
वय्कलं कप्तानं राजीनामा बिउसां क्रिकेट धाःसा म्हिता हे च्वनेगु खँ धाःगु दु । ‘जितः न्ह्याबलें उच्चस्थानय् च्वनाच्वनाबलय् हे त्वःतेगु मन जुयाच्वंगु खः, जितः ताः न्हूगु नेतृत्व वःगु थ्व ई हे सही ई खः ।’थ्वयां छन्हु न्ह्यव जक अन्तर्राष्ट्रिय क्रिकेट परिषदं (आइसीसीं) नेपाल क्रिकेट संघ (क्यान)याया निलम्बन फुकुवा यासें ससर्त सदस्यता बीगु निर्णय याःगु खः ।
कप्तान खड्कां राजीनामा बीगु झ्वलय् क्यानया न्हूगु कार्यसमिति, कासामि व मेपिं साझेदारतय्सं नेपाली क्रिकेटयात बांलाकेमा धयागु कामना नं यानादीगु दु । वय्कलं नेपाली क्रिकेटय् फुक्कं न्हूकथं सुरु जुइमाः धकाः थःम्हं कप्तानी त्वःतेगु ई वःगु खँ नं धयादीगु दु ।
आइसीसीपाखें नकतिनि फुकुवा जूगु क्यानं धाःसा पारसया राजीनामा बारे थःपिंसं मसिउनिगु खँ धाःगु दु । न्हूगु कार्यसमितिया अध्यक्ष चतुरबहादुर चन्दं थःपिंत आधिकारिक रुपं राजीनामा बारे जानकारी मवःनिगु खँ धयादीगु दु ।
LEAVE YOUR COMMENTS