आः छम्ह व्यक्ति निगू सहकारीया सदस्य जुइ मदइगु

येँ (नेपालभाषा टाइम्स) – आवंलि छम्ह हे व्यक्ति निगू सहकारी संस्थाया सदस्य जुइ मदइगु जूगु दु। सहकारी विभागं वइगु कात्तिक १ गतेनिसें छगू हे प्रकृतिया निगू सहकारी संस्थाया सदस्य जुइ मदइगु व्यवस्था यायेत्यंगु खः ।

विभागं सहकारी ऐन-२०७४ य् जुयाच्वंगु व्यवस्थाकथं वइगु कात्तिक १ गतेनिसें छम्ह छगू हे प्रकृतिया निगू सहकारी संस्थाय् सदस्यता जुयाच्वंगु खःसा दोहोरो सदस्यता अन्त्य यायेत्यंगु। विभागया रजिष्ट्रार डा. टेकराज पाण्डें थः गुगु सहकारी संस्थाया सदस्य जुइगु धइगु छनोट याये दइगु जानकारी बियादिसें थम्हं ल्यःगु गुगुं नं छगू सहकारी संस्थाया सदस्यता कायम यानाः मेगु सहकारी संस्थाया सदस्यता अन्त्य यायेत सूचना नं जारी यायेधुंगु धयादिल । अथे हे विभागं दक्वं सहकारी संस्थायात दोहोरो सदस्यता कयातःपिं दुगु खःसा अज्याःपिं शेयर सदस्ययात जानकारी याकाः छगू जक सहकारी संस्था ल्ययेगु निंतिं प्रक्रिया मिले यायेत नं निर्देशन बिउगु दु ।

सहकारी ऐन, २०७४ या दफा ३२ या उपदफा १ (क)य् सुं नं व्यक्ति छगू हे स्थानीय तहय् छगू हे प्रकृतिया छगू स्वयां अप्वः सहकारी संस्थाय् सदस्य जुइ मदइगु व्यवस्था यानातःगु दु। थुगु ऐन जारी जुइ न्ह्यः तक छगू स्वयां अप्वः सहकारी संस्थाय् सदस्य जूसां नं स्वदँ तक छगू जक संस्थाया सदस्यता कयाम यायेत व्यवस्था यानातःगु खः ।

थौंकन्हय् देय्न्यंकंया सहकारी संस्थाया सदस्यतय् विवरण सफ्टवेयरपाखें अद्यावधिक यायेगु ज्या जुयाच्वंगु विभागया रजिष्ट्रार पाण्डे कनादिल । विशेष यानाः सहरी लागाय् संचालन जुयाच्वंगु छगू हे प्रकृतिया आपालं सहकारी संस्थाय् अप्वःथें मनूत सदस्य जुयाच्वंगु दु। विवरण अद्यावधिक यायेगु ज्या क्वचायेकाः गुलि मनूतय्सं दोहोरो सदस्यता कयातःगु दु धइगु एकीन जुइगु नं वय्कलं कनादिल ।

सहकारी ऐनय् जुयाच्वंगु व्यवस्थाकथंया निर्देशन पालना मयात वा सहकारी कानून पालना मयात धाःसा कानूनी व्यवस्थाकथं सजाय जुइगु व थ्व अन्तर्गत निगू लख तक जरिवाना जुइगु नं वय्कलं धयादिल । सहकारी विभागं २०७४ कात्तिक १ गते जारी याःगु सहकारी ऐन-२०७४ वइगु असोज मसान्तय् स्वदँ पूवनीगु जुइवं दोहोरो सदस्यता कयातःपिंसं आः छगू जक सहकारी ल्ययेमालीगु जूगु दु ।