बिस्काः सम्बन्धी किपा ब्वज्या

येँ – रोटर्‍याक्ट मध्यपुर शाखाया ग्वसालय् जूगु बिस्काः सम्बन्धी किपा ब्वज्याय् आयुष शाक्य न्हाप लाःगु दु । शाक्ययात उत्कृष्ट सांस्कृतिक फोटोग्राफर घोषणा याःगु खः । न्हाप जुयादीम्ह शाक्ययात प्रोत्साहनकथं फोटोग्राफी सम्बन्धी थीथी सामग्री उपलब्ध याकूगु खः ।

संस्थापाखें दँय्दसं थुकथं किपा ब्वज्या व धेंधेंबल्लाः याना वयाच्वंगु खःसा थुगुसी प्यक्वःखुसी थुगु ज्याझ्वः जूगु खः । थुगुसी जूगु ब्वज्याय् राजु महर्जन लिउ व कपिलचन्द्र पाल लियांलिउ लाःगु दु । ब्वज्याय् स्वंगू दर्जन स्वयां अप्वःसिनं ब्वति काःगु खः ।

क्लबया नायः चन्द्र चक्रधरं विशेष यानाः सांस्कृतिक प्रवद्र्धन यायेगु उद्देश्यं थःपिंसं वंगु छुं दँ न्ह्यवनिसें थुकथंया किपा ब्वज्या व कासायात निरन्तरता बिया वयाच्वनागु दु धयादिल । आःयात मध्यपुर लागाय् जक सीमित जुयाच्वंगु थुकथंया ज्याझ्वः वइगु दिनय् येँ यल लगायत मेमेगु जिल्लाय् नं ग्वसाः ग्वयेगु विचाः दुगु नं वय्कलं उगु इलय् जानकारी बियादिल ।

ज्याझ्वलय् ख्वप क्षेत्र नं २ या प्रदेशसभाया सांसद राजेन्द्रमान श्रेष्ठं फोटोग्राफीया माध्यमं कला, संस्कृति, सम्पदालिसे सम्बन्धित महत्वपूर्ण दस्तावेजयात कैद यानाः पुस्तारन्तरण याये फइगु खँय् बः बियादिल । छपाः किपापाखें आपालं सन्भर्दयात पिब्वये फइगु जूगुलिं सांस्कृतिक प्रवद्र्धनय् लगे जुइपिं फोटोग्राफरयात ग्वाहालि यायेत थः इच्छुक जूगु वय्कलं धयादिल ।

लिसें वय्कलं प्रदेशस्तरय् दयेकेमाःगु योजनाया निंतिं सांस्कृतिक अवस्थाया बारे किपापाखें सुझाव बीत नं वय्कलं इनाप यानादिल । किपापाखें सांस्कृतिक पक्ष बाहेकं कला, संस्कार व सम्पदाजन्य सम्पत्तिया अवस्थायात प्रचार प्रसार यायेगु ज्या संस्थां याना वयाच्वंगु दु । मध्यपुर थिमिया गुंगः चीभाः त्वालय् जूगु किपा ब्वज्याय् आपालं विशिष्ट व्यक्तित्वलिसें पत्रकार, समाजसेवी व स्थानीयतय् सहभागिता दुगु खः ।