गृह, रक्षा, अर्थ व उद्योग मन्त्री नियुक्त

येँ – प्रधानमन्त्री केपी ओलीं थौं मन्त्रिपरिषद विस्तार यासें प्यम्हेसित मन्त्री दयेकूगु दु । सरकारया मू मू मन्त्रालयय् थौं मन्त्री नियुक्त याःगु खः ।
थौं एमालेपाखें इश्वर पोखरेल व डा. युवराज खतिवडा व माओवादी केन्द्र पाखें रामबहादुर थापा व मातृका यादव मन्त्री जुयादीगु खः ।

इश्वर पोखरेलयात रक्षा मन्त्रालयया जिम्मा बिउगु दुसा डा. खतिवडायात अर्थ मन्त्री दयेकूगु दु । अथेहे माओवादीया रामबहादुर थापायात गृह मन्त्रालय बिउगु दु सा मातृका यादवयात उद्योग, वाणिज्य तथा आपूर्ति मन्त्री दयेकूगु दु ।

थौं हे छगू समारोह दथुइ राष्ट्रपति विद्यादेवी भण्डारीं नवनियुक्त मन्त्रीतय् शपथ ग्रहण याकूगु दु ।अर्थ मन्त्री जुयादीम्ह डा. खतिवडा न्हापांखुसी मन्त्री जुयादीम्ह खः । वय्कः थ्वयां न्ह्यः राष्ट्रिय योजना आयोगय् निक्वः उपाध्यक्ष व राष्ट्र बैंकया गर्भनर जुयादीधुंकूम्ह खः ।

अथेहे गृहमन्त्री जुयादीम्ह थापा माओवादी अध्यक्ष प्रचण्ड प्रधानमन्त्री जुयादीबलय् रक्षामन्त्री जुयादीम्ह खः । एमाले महासचिव इश्वर पोखरल व मातृका यादव नं न्हापा मन्त्री जुयादीधुंकूपिं खः ।