प्रज्ञा प्रतिष्ठानय् नेपालभाषा चिबाखं न्यनेकने ज्याझ्वः
येँ – नेपाल प्रज्ञा प्रतिष्ठान व विराट नेपालभाषा साहित्य सम्मेलन गुथिया मंकाः ग्वसालय् नेपालभाषा काव्य व चिबाखं न्यनेकने ज्याझ्वः वंगु शनिवाः जुल । प्रज्ञा भवनया देवकोटा कक्षय् प्रतिष्ठानया मातृभाषा कवःया कजि साहित्यकार लक्ष्मी मालीया सभापतित्वय् व प्रतिष्ठानया कुलपति गंगाप्रसाद उप्रेती मूपाहांकथं झायादीगु ज्याझ्वलय् न्हूपिं व पुलांपिं यानाः स्वीम्हेसिनं थःथःगु रचना पाठ यानादीगु खः ।
ज्याझ्वलय् डा. पुष्पराज राजकर्णिकार, गोविन्दमान श्रेष्ठ,, भूषणप्रसाद श्रेष्ठ, स्नेह साय्मि, सुधीर ख्वबि, पुष्परत्न तुलाधर, सुरेश किरण, सौरभ शाक्य, महेशमान डंगोल, विमलप्रभा वज्राचार्य, न्हुछेभक्त कवां, श्रीराम श्रेष्ठ, रजनी मिला, बद्री वेदना, नारद वज्राचार्य, नरेश अमात्य, रेणु श्रेष्ठ, रेखा शाक्य, महेन्द्रगोपाल कर्माचार्य, तेजकृष्ण श्रेष्ठ लगायतया च्वमिपिंसं रचना पाठ यानादीगु खः ।
ज्याझ्वलय् नवासें प्रतिष्ठानया कुलपति उप्रेतीं नेपालभाषा व मैथिली भाय् साहित्य व संस्कृतिइ तःमिगु भाय् खः धासें देय्या हिलावंगु राजनीतिक परिवेश लिपा प्रतिष्ठानं दक्वं भाय्यात उतिग्यंक थाय् बीगु कुतः न्ह्याका वयाच्वनागु दु धयादिल ।
लिसें वय्कलं साहित्य ख्यःयापिंसं बांलाःगु उद्देश्यया ज्याझ्वः ज्वना वल धाःसा उकियात ग्वाहालिया निंतिं प्रतिष्ठान न्ह्याबलें तयार दु धयादिल । ज्याझ्वलय् विराटया नायः कृष्णभक्त बोडें सुभाय् देछानादीगु खः ।
LEAVE YOUR COMMENTS