विदेश वनीपिं ज्यामि अप्वः अदक्ष कोरियां म्हो जक रेमिट्यान्स
येँ – नेपाली ज्यामित वैदेशिक रोजगारय् वनीबलय् दक्ष मजुइकं हे वनीगु यानाच्वंगुलिं नं समस्या वयाच्वंगु खँ धाःगु दु । थुकिया कारणं म्यानपावर कम्पनी निसें दलाल व रोजगारदाता कम्पनीपाखें तकं नेपाली ज्यामितय्सं दुःख फये मालाच्वंगु दु । आवश्यक सीप व दक्षताया अभावय् गुलिखे नेपालीतय्त ज्या हे मदइगु अवस्था तकं दु ।
दक्षताया अभावं रोजगारी चूलाकेधुंकूपिंसं नं तसकं म्हो जक तलब कयाः ज्या यायेमाःगु बाध्यता दु । नेपाल राष्ट्र बंंैकया कथं विदेशय् ज्या याःवनीपिं मध्ये मुक्कं १.५ प्रतिशत ज्यामित जक दक्ष दु । २४ प्रतिशत अर्धदक्ष दुसा मेपिं फुक्क धयाथें अदक्ष ज्यामित हे वैदेशिक रोजगारय् वनाच्वंगु खँ राष्ट्र बंकया विदेशी मुद्रा व्यवस्थापन विभागया कार्यकारी निर्देशक भीष्मराज ढुंगानां धयादिल ।
अप्वः धयाथें अर्धदक्ष ज्यामित जापान व कोरियाय् वनेगु यानाच्वंगु दु । वय्कलं आः नेपाःया आर्थिक परिसुचक बांलानाच्वंगु व रेमिट्यान्स नं दुहां वयेगु अप्वयाच्वंगु धासें कूलगार्हस्थ उत्पादनय् रेमिट्यान्स अप्वइगु अनुमान नं यानादीगु दु ।नेपालय् थगुने रेमिट्यान्स ८.६ प्रतिशतं अप्वया ७५५ अर्ब ६ करोड थ्यंगु खः ।
आवश्यक सीप व दक्षताया अभावय् गुलिखे नेपालीतय्त ज्या हे मदइगु अवस्था तकं दु ।
वंगु खुला दुने नं रेमिट्यान्स ३०.२ प्रतिशतं अप्वया ४४३ अर्ब ३६ करोड थ्यनेधुंकूगु राष्ट्र बंैकया तथ्यांकय् न्ह्यथनातःगु दु ।नेपालय् दँय् न्यागू लाख युवा रोजगारीया निंतिं योग्य जुइ । आःतक ४३ लाख ज्यामि वैदेशिक रोजगारय् दुगु तथ्यांक दु ।
नेपालं ११० गू देशय् जक रोजगारीया निंतिं अनुमति दुसां १६७ गू देशय् नेपाली ज्यामित थ्यनाच्वंगु दु ।कोरियाय् जक आधिकारिक रुपं वंपिं ३५ हजार दुसा अनौपचारिक तथ्यांकय् ५ हजार ज्यामित दु ।
कोरियां म्हो जक रेमिट्यान्स
सरकारी तथ्यांकयात आधार दयेकेबलय् छम्ह नेपाःमिं कोरियां औसत १ लाख ७० हजार कमे याइ । थुकिया आधारय् थगुने जक ६३ अर्ब तका रेमिट्यान्स दुहां वयेमाःगु खःसा मुक्कं १७ अर्ब जक दुहां वल । कोरियां वयेमाःगु रेमिट्यान्सय् थ्व २५ प्रतिशत जक खः ।
कोरियाय् थ्यनाच्वंपिं ४० हजार ज्यामितय् ल्याखं हिसाब यायेबलय् थ्व दँय् नं ८२ अर्ब दुहां वयेमाःगु राष्ट्र बैंकया विदेशी मुद्रा व्यवस्थापन विभागया कार्यकारी निर्देशक ढुंगानां धयादी, तर वंगु खुला दुने मुक्कं १६ करोड जक दुहां वःगु दु । थुगुसी मुक्कं ३६ अर्ब जक दुहां वइगु अनुमान दु ।
वय्कःया कथं थुगुसी ३६ अर्ब दुहां वःसां मुक्कं ४३ प्रतिशत जक जुइ । थुकियात शतप्रतिशत थ्यंकेमाःगु वय्कःया धापू दु । कोरियाया सरकारं वंगु जनवरी निसें नेपालीतय् तलब ११ प्रतिशतं अप्वयेकूगु व न्हूगु नीति लगायतया कारणं थुकी प्रभाव लाइगु खँ नं धाःगु दु । राष्ट्र बैंकं छुं ई न्ह्यव जक कोरियाया जेबी बैंकया पदाधिकारीत लिसे रेमिट्यान्स बारे सहलह याःगु खः ।
राष्ट्रिय योजना आयोगया पुलांम्ह उपाध्यक्ष दीपेन्द्रबहादुर क्षेत्रीं सन् १९५६ पाखे निगू देशया प्रतिव्यक्ति आय समान जुयाच्वंगुलिइ आः कोरियाया ३० हजार डलर दुगु व नेपाःमिया १ हजार ४०० डलर जक दुगु खँ न्ह्यथँसें थुकिं नेपाःमिपिंसं कोरियापाखें यक्व सयेकेमाःगु दु धयादिल ।
वय्कलं नेपालय् वित्तीय स्रोतया अभाव दुगु धासें स्थायी सरकार दुगुलिं औद्योगिक वातावरण दुगु धासें लगानी यायेगु निंतिं कोरियायात इनाप नं यानादीगु दु । कोरियाया जेबी बैंकया प्रमुख कार्यकारी अधिकृत लिम योङ टेइं नेपाःमितय्सं जेबी बैंकपाखें कारोवार अप्वयेकाच्वंगु धासें थ्व बैंकय स्वद्वः नेपाःमि स्वानाच्वंगु खँ धयादिल ।
LEAVE YOUR COMMENTS