ग्रिजम्यानं एथलेटिको त्वःतल

एजेन्सी- एथ्लेटिको म्याड्रिडया स्ट्राइकर एन्टोनी ग्रिजम्यानं थ्व सिजनया अन्तलिसें क्लब त्वतेगु घोषणा याःगु दु । ला लिगा अन्र्तगत शनिवाः लेभान्टे लिसे जुइगु अन्तिम कासा लिपा ग्रिजम्यानं क्लब त्वतीगु जूगु दु । फ्रान्सयात विश्वविजेता दयकेत मू भुमिका म्हितूम्ह ग्रिजम्यान स्पेनिस क्लब एथ्लेटिकों न्यादँ तक म्हितेधुंकाः क्लब त्वःतेत्यंगु खः । सन् २०१४ य् ग्रिजम्यान रियल सोसिडाडं एथ्लेटिको वःगु खः ।

ग्रिजम्यानं थःगु ट्विटरय् छगू भिडियो पोष्ट यासें धागु दु, ‘थ्व न्यादँ उत्कृष्ट जुल, दक्वंया निंतिंं धन्यवाद । जितः यक्व माया बिउपिं समर्थकपिंत जिं क्लब त्वतेत्यनागु जानकारी बियाच्वना, न्हूगु स्वयेत अले न्हगु चुनौतीया निंतिं ।’ २८ दँ दुम्ह ग्रिजम्यान धाःगु दु ‘जितः क्लब त्वतेगु निर्णय यायेत थाकुल, तर थ्व निर्णय हे जितः सही व आवश्यक थें ताल ।’ फ्रेन्च कासामि ग्रिजम्यानं एथ्लेटिकोया निंति २५६ कासा म्हिताः १३३ गू गोल याःगु दु । ग्रिजम्यान एथ्लेटिको म्याड्रिडय् च्वनाः युुुुरोपा लिग, स्पेनिस सुपर कप व युइएफए सुपरकप त्याकूगु खः । ग्रिजम्यान एथ्लेटिकोया लिपांगु न्यागू सिजनया उच्च गोलकर्ता नं खः ।

एथ्लेटिको म्याड्रिड त्वःतूम्ह ग्रिजम्यान थ्व सिजनया स्वम्हम्ह हाइप्रोफाइल कासामि खः । एथ्लेटिकोया लुकास हर्नान्डेज बार्यन म्युनिख वनेत्यंगु दुसा कप्तान डिएगो गोडिनं नं क्लब त्वतेगु घोषणा यायेधुंकल । ग्रिजम्यान एथ्लेटिको त्वःताः मेगु स्पेनिस क्लब बार्सिलोना वनीगु चर्चा जुयाच्वंगु दु । वंगु सिजनय् हे बर्सिलोनां ग्रिजम्यानयात क्लबय् हयेत स्वःगु खःसा अब्ले ग्रिजम्यानं बार्साया प्रस्ताव स्वीकार मयाःगु खः । व इलय् एथ्लेटिकों बार्सिलोनाविरुद्ध फिफाय् उजुरी नं तःगु खः । ग्रिजम्यानयात क्लब हयेत बार्सिलोनां एथ्लेटिकोयात १२० मिलियन युरो पूगु खँ बीबीसी जानकारी बिउगु दु ।