नेवाः पत्रकार दबूपाखें ल्ह्वनेमाःगु पलाः
नेवाः पत्रकारतय्त संगठीत यानाः यंकेगु कुतः स्वरुप नीस्वंगु नेवाः पत्रकार राष्ट्रिय दबूया स्वक्वःगु महाधिवेशन नकतिनि क्वचाल । महाधिवेशनपाखें न्हूगु कार्यसमिति ल्ययेगु ज्या नं जुल । लोकतान्त्रिक अभ्यास कथं च्यादँया दुने स्वक्वः तक सफलतापूर्वक महाधिवेशन क्वचायेकेगु ज्या दबूपाखें याःगु जुल ।
उकीया निंतिं दबुया निवर्तमान कार्यसमितियात भिंतुना । नापं न्हूगु कार्यसमितिइ ल्यःपिं न्हूपिं पदाधिकारीतय् कार्यकाल सुथां लायेमाः, वय्कःपिंत नं भिंतुना । छुं नं छगू संस्था नीस्वनेगु निंतिं उकीया छगू निश्चित उद्देश्य दइ । नेवाः पत्रकार राष्ट्रिय दबू नं अज्याःगु निश्चित उद्देश्य ज्वनाः नीस्वंगु खत ।
दबूया प्रस्तावनाय् च्वयातःगु दु, ‘नेपाःन्यंकया आमसंचारय् ज्या यानाच्वंपिं नेवाः संचारकःमितय्त छगू सूत्रय् आवद्ध यानाः राष्ट्रिय विकासया प्रवाहलय् संलग्न याकेगु नापं प्राचिनकाल निसें नेवाः जातिं न्ववाइगु नेपालभाषाया समृद्ध विकास, थुकीया संरक्षण व सम्वद्र्धन यानाः….. मानव सभ्यताया सामाजिक विकासक्रमय् अन्तरनिहित भाषिक महत्वयात बः बिउसें पत्रकारिताया माध्यमपाखें नेपालभाषाया युगान्तकारी महत्वयात निरन्तरता कायम याकेगु ।’
दबूया उद्देश्य कथं च्यादँया दुने थुगु संस्थाया निगू दर्जन स्वयां अप्वः थासय् संगठन विस्तार यायेत ताःलाःगु दु । पूर्वया झापा, सुन्सरी निसें धादिङ, गोरखालगायत थासय् संगठन विस्तार यायेगु ज्या जूगु दु । संस्था नीस्वंगु म्हो इलय् नं थुलि जिल्लाय् थ्यंकेगु अःपूगु विषय मखु । उकी नं छगू निश्चित जाति समुदायया जक पत्रकारय् संगठन जूगुलिं नं संगठन विस्तार यायेत सरल जुइमखु ।
छगू जिल्लाय् छम्ह–निम्ह जक पत्रकार दुसां उमित संगठित यानाः यंकेफुगु धइगु नेवाः पत्रकार राष्ट्रिय दबूया सफलता कथं कायेमाः । नेवाः पत्रकारतय् संगठित यानाः यंकेगु व जिल्ला जिल्लाय् संगठन विस्तार यानाः यंकेगु विषयय् दबूया ज्या च्वछायेबहःजू । संचार क्षेत्रया प्यंगूलिं माध्यय् नेवाः संचारकःमितय् उपस्थिति दु ।
स्वक्वःगु महाधिवेशनया झ्वलय् विशेष यानाः स्वनिगः पिनेयापिं पत्रकारपिंसं नेवाः भाय् मथूगुलिं ज्याझ्वः नं खँय् भासं सम्बोधन यायेमाःगु तकंया वातावरण वल । उकिं दकलय् न्हापां संगठन विस्तार जुइधुंकूगु थाय्या प्रतिनिधिपिंतिं नेवाः भाय्या तालिमया व्यवस्था यायेमाल ।
म्हो जक जूसां नेवाः समुदायया संचारकःमितय् उपस्थिति दु । राष्ट्रिय नापं अन्तर्राष्ट्रिय संचारमाध्यमय् तकं नेवाः समुदायया संचारकःमित कार्यरत दु । थुकी पाखे धाःसा दबूपाखें ध्यान तयाः वय्कःपिं नं समाहित यानाः यंकेगु ज्या जूसा दबूया दायरा अझ तब्याः जुयावनी । अन्तर्राष्ट्रिय संचारमाध्यत बिबिसी, अल्जजिरा, एपिएफ लगायतय् नेवाः समुदायया प्रतिनिधित्व दु ।
वय्कःपिंत नं दुथ्याकाः यंकेफुसा पत्रकार दबूपाखें यक्व अनुभव कालबिल यायेगु ह्वताः तकं चूलाइ । अथेहे नेवाः पत्रकारतय्त संगठित याना वयाच्वंगु पत्रकार दबूपाखें आः ल्ह्वनेमाःगु मेगु छगू पलाः खः – नेपाल पत्रकार महासंघय् नेवाः पत्रकारतय्त दुथ्याकीगु । झीसं सिउगु खँ खः, पत्रकार महासंघया संस्थापक नेवाःतय् काय्मचा जूसां बुलुहुँ अनं नेवाःतय् पहुँच व ब्वति म्हो जुयावन ।
उकिं दकलय् न्हापां नेवाः पत्रकारतय्त पत्रकार महासंघया दुजः जुइगु लकस दयेकेमाःगु आवश्यकता दु । थथे यायेफुसा छुं ई लिपा नेवाःतय्सं पत्रकार महासंघया पदाधिकारीलय् तकं ल्वायेफइगु वातावरण दया वनी । देय्न्यंक च्वपिं पत्रकारतय् संगठनया पदाधिकारीलय् छम्ह नेवाः थ्यनीगु धइगु नेवाःतय् मुद्दायात स्थापित यायेगु छगू ह्वताः नं खः ।
पत्रकारतय्त संगठित यानाः यंकेगु लिसें दबूपाखें ल्ह्वंगु मेगू मुद्दा धइगु नेपालभाषाया समृद्ध विकास, थुकीया संरक्षण व सम्वद्र्धन खः । आः पत्रकार दबूपाखें ल्ह्वनेमाःगु पलाः धइगु थुखेपाखे खः । स्वक्वःगु महाधिवेशनया झ्वलय् विशेष यानाः स्वनिगः पिनेयापिं पत्रकारपिंसं नेवाः भाय् मथूगुलिं ज्याझ्वः नं खँय् भासं सम्बोधन यायेमाःगु तकंया वातावरण वल ।
उकिं दकलय् न्हापां संगठन विस्तार जुइधुंकूगु थाय्या प्रतिनिधिपिंतिं नेवाः भाय्या तालिमया व्यवस्था यायेमाल । नेवाः भाय्या विकास यायेगु निंतिं संगठन दुनेया दुजःपिंपाखें सुरुवात याःसा कन्हय् संचारया क्षेत्रं नेपालभाषायात संरक्षण व सम्वद्र्धन यायेत अःपुइ ।
अथेहे नेवाः समुदायया हकहित सम्बन्धि मुद्दात सञ्चार माध्यमपाखें प्रचार प्रसार यायेगु÷याकेगु विषय नं दबूया छगू प्रमुख उद्देश्यय् लाः । तर दुःखद् खँ राष्ट्रिय स्तरया संचारमाध्यमय् नेवाः समुदायया संचारकःमितय् ल्याः तसकं म्हो । राष्ट्रिय समाचार समिति थज्याःगु राष्ट्रिय स्तरया प्रमुख संचार संस्थाय् मुक्कं स्वम्ह–प्यम्ह जक नेवाःतय् उपस्थिति दु ।
थज्याःगु अवस्थाय् नेवाः समुदायया विषय, नेवाः समुदायया हकहितया खँ राष्ट्रिय स्तरया माध्यमय् म्हो जक प्रकाशन÷प्रशारण जुइगु स्वभाविक खः । थुगु विषययात दबूपाखें गम्भीर रुपं कायेमाःगु आवश्यकता दु । राष्ट्रिय स्तरया संचार माध्यमय् नेवाःतय् उपस्थिति अप्वयेकेगु निंतिं पत्रकारतय्त उचित तालिमया व्यवस्था, अवसरया पहिचान व खोजी यायेगु ज्याय् सहजीकरणया भूमिका म्हितेफइ ।
नेवाः समुदायया प्रतिनिधित्व राष्ट्रिय स्तरया संचारमाध्यय् गुलि अप्वइ, स्वभाविक रुपं नेवाः भाय्, कला, संस्कृति नापं नेवाः पहिचानया मुद्दा उलि हे सशक्त ढंगं संचारमाध्मय् थ्वइ । अमेरिकी वकिल नापं च्वमि एन्द्रिउ भाचसं धयादी, ‘पत्रकारितां प्रजातन्त्रयात ल्यंकातइ । थ्व प्रगतिशील सामाजिक परिवर्तनया छगू शक्ति खः ।’
बहुलतायुक्त समाज जूसां छगू जक भाषा व संस्कृतिया प्रभुत्व कायम यानातःगु नेपालय् सामाजिक परिवर्तनया निंतिं ज्या याइगु पत्रकारिताया आवश्यकता खनेदु । यदि सामाजिक परिवर्तनय् पत्रकारितां भूमिका म्हितूसा जक देय्या लोकतन्त्र बल्लाइगु खः ।
नेवाः पत्रकारतय्त संगठित यानाच्वंगु नेवाः पत्रकार राष्ट्रिय दबुलिं प्रगतिशील सामाजिक परिवर्तनया शक्ति निर्माण यायेलिं नं भूमिका म्हितेफयकेमाः । छगू जक भाषाया वर्चश्व दयाच्वंगु देशय् फुक्कं भाषाया सम्मान अधिकारया खँ ल्ह्वनाः सामाजिक हिउपाः हयेगु निंतिं प्रभावकारी भूमिका म्हितेफयेमाः । सामाजिक न्यायया निंतिं थःगु भूमिकायात सशक्त यायेफयेमाः । न्हूगु कार्यसमितियात हानं छक्वः भिंतुना ।
LEAVE YOUR COMMENTS