थुगुसिया चिहासंकिपा

नेपालभाषाया फिल्म ख्यलय् थौंकन्हय् शर्टफिल्म यानिकी चिहासंकिपाया लहर न्ह्यानाच्वंगु दु । प्यदँन्यादँ निसें न्ह्यानावःगु थ्व चिहासंकिपाया लहर न्ह्याकूम्ह धयाम्ह पवित्र कसाः खः ।

वयागु हे कुतलय् मच्छिन्द्र क्लबया ग्वसालय् न्ह्यानाच्वंगु नेवाः संकिपा नखःया दुने दुथ्याकाः दकलय् न्हापांखुसी नेवाः शर्ट फिल्म कासाया रुपय् चिहासंकिपा कासा जूगु खःसा अनंनिसे न्ह्याःगु चिहासंकिपाया यात्रा थुगुसी वयाः ‘नेपालभाषा टाइम्स चिहासंकिपा’ सिरपा कासाया रुपय् क्वचाःगु दु । थुगुसि मुक्कं झिंखुगू चिहासंकिपां ब्वति काःगु उगु कासाय् ल्याय्म्ह पुस्ताया संकिपामिपिनिगु ब्वति बांलाक हे खनेदत ।

थुकी दुतिंगु झिंखुगू संकिपाय् पुलांगु पुस्ताया नांजाःम्ह निर्देशक पवन जोशीया “मतिना” अथेहे तुं रामकृष्ण खडगीया “स्वार्थ”या नापनापं नेपाःया नाटक व संकिपा ख्यलय् नांजाःम्ह कलानिर्देशक निर्जल श्रेष्ठं निर्देशन याःगु “पसः” स्वंगू त्वःताः मेगु झिंप्यंगुलिं संकिपाया निर्देशकत जक ल्याय्म्ह पुस्ताया मखसे थुकी दुथ्यानाच्वंपिं कलाकार व प्राविधिकपिं नं आपालं यानाः ल्याय्म्ह पुस्ताया प्रतिनिधित्व याइपिं हे खनेदत ।

थ्व छगू लसकुस यायेबहगु खँ कथं कायेमा । चिहासंकिपा ग्वसाः खलकं थुगुसी नेपालभाषाया साहित्यिक कृतिया लिधंसा कयाः चिसंकिपा दयेकेत इनाप याःगु खः । थुकिं नेपालभाषाया साहित्य प्रति संकिपामिपिनिगु नुगः क्वसाना वनीगु आस याःगु खः तर अथे जुइमफुत । गुलिखे संकिपामिपिंसं चिसंकिपा दयेकेया निंतिं थःथःम्हेसिनं हे बाखं च्वयाः उकीयात छुं नं छुं सञ्चार माध्यमय् पिथनेगु ज्या यात ।

पिदंगु बाखं वा साहित्यिक कृतिया लिधंसाय् संकिपा दयेकेमाःगुलिं गुलिसिनं ला फेसबुकय् बाखं पिथना उकीया लिधंसाय् चिसंकिपा दयेकूगु खनेदतसा गुलिसिनं ला काचाकाचा पत्रपत्रिकाय् थःत पाय्छि कथंया बाखं पिथंके बियाः उकी संकिपा दयेबिउगु नं खनेदत ।

पसः
प्रकाशित पुलांगु बाखं यानिकि साहित्यिक कृतिइ हे दयेकूगु छगू चिसंकिपा “पसः” खः । थ्व साहित्यकार शशीकला मानन्धरं च्वयातःगु बाखं खः । निर्जल श्रेष्ठं निर्देशन याःगु चिसंकिपाय् थौंकन्हय् न्हून्हूगु छेँ दयेका हयाच्वंगु व अज्याःगु छेँय् पसः तयेत अप्वः बाः पुलिपिं वइबलय् पुलांपिंत थनाछ्वइगु खँयात न्ह्यब्वयातःगु दुसा थुकिं याना नेवाःत नेवाः बस्तीं पिने लाना वनाच्वंगु खँयात क्यनातःगु दु । थुकी शशीकला मानन्धर थःम्हेसिनं हे पीडित मिसाया मू–भुमिका म्हितातःगु दुसा घरपतिया रुपय् पुष्कर माथेमां म्हितातःगु दु ।

म्युजियम
“म्युजियम” नांयागु चिसंकिपाया बाखं कलाकार लक्ष्मीकुमार महर्जनं च्वयातःगु खः । थ्व संकिपाया निर्देशक रजिन महर्जन खः । थुकी छगू म्यूजियमय् ज्या याइम्ह छम्ह मनुखं अन ब्वयातःगु छगू मूर्तियात प्रतीक कथं छ्यलाः छम्ह मनूया विवशतायात न्ह्यब्वयातःगु दु । थ्व संकिपाय् लक्ष्मीकुमार महर्जनं मेन रोल म्हितातःगु दुसा थुकी सोफिला कार्की व बालकलाकार हंसिका बज्राचार्यया मेन रोल दु ।

ईन्द्रायणी
थ्व छगू पुलां बाखं खः । तःमि व चिमि दथुइ जुइगु भेदभावयात क्यनातःगु थ्व बाखं ईन्द्रायणी अजिमा यानिकि लुति अजिमाया बाखंयात न्ह्यब्वयातःगु दु । दर्शनबीर शाक्यं निर्देशन याःगु थ्व चिसंकिपाय् आराध्यलक्ष्मी खड्गीया मेनरोल दुसा थुके रुपेन्द्र श्रेष्ठया नं छगू बचाहाकःगु रोल दु ।

 

ग्वाय्पिया सुकुद्यां
थ्व ख्यालिख्यःया छगः थां कथं कयातःम्ह श्रीकृष्ण अणुया ख्यालः “ग्वाय्पिया सुकुद्यां”यात चिसंकिपाय् वि.सं.२०३० सालया ल्याय्म्ह पुस्ताया नुगःखँयात न्ह्यब्वयेगु कुतः यानातःगु दुसा उगु ईया शिक्षा नीतियात न्ह्यब्वयेगु कुतः यानातःगु दु । सुनिता जुनुं निर्देशन याःगु थ्व चिसंकिपाय् पुलांम्ह कलाकार आशाकाजी थकु, हरिमान दिवाकर, राजु महर्जन जुजु व मुकेश किलम्बुया मेनरोल दु । थुकी मिसा पात्र छम्ह नं छ्यलाःतःगु मदु ।

मतिना
“बांलाः मय्जु” संकिपापाखें राष्ट्रिय चलचित्र पुरस्कारय् सर्वोत्कृष्ट निर्देशकया सिरपा त्याकूम्ह पुलांम्ह निर्देशक पवन जोशीया थ्व चिसंकिपाय् मतिनाय् वइगु जातभातया पंगःयात न्ह्यब्वयेगु कुतः यानातःगु दुसा थुकी रामकृष्ण धिनां, अन्नु महर्जन, मीना महर्जन, राजेन्द्र महर्जन(राजी), रञ्जना जोशी व लक्ष्मीकुमार महर्जनया मेनरोल दु । थ्व चिसंकिपाया बाखं श्रीकृष्ण ज्यापु याःगु खः ।

बैना भ्वं
थौंकन्हय् भुमाफियात जग्गा न्याये–मीगुलिइ आपालं सकृय जुया वयाच्वंगु व अज्याःपिंसं धमाधम जग्गा मिइकेगु ज्या यानाच्वंगुया विरोध यायेमाः धका सः थ्वयेकेगु कुतः यानातःगु थ्व चिसंकिपाया बाखं हरिसुन्दर पोतामाहाँया बाखंया लिधंसाय् दयेकूगु खः । थुके कृष्ण प्रजापतिं मेनरोल म्हितातःगु दु ।

घात÷लसता÷लिचिउगु स्वचेतना
नांजाम्ह मोडल व फेशन डिजाइनर शोभा महर्जनया कल्पना अले प्रज्वल शाक्यं निर्देशक याःगु स्वंगु चिसंकिपा घात÷लसता÷लिचिउगु स्वचेतनाया बाखंया कल्पनाकार, निर्देशक व क्यामेरापर्सन बि के जल्मी लगायतया प्राविधिक पुचः छगू हे खःसां प्याखंया प्रस्तुति धाःसा बिस्कं बिस्कं खनेदु ।

घात चिसंकिपाय् थौंकन्हय् सुनानं सुयातं विश्वास याये मजिउ धकाः क्यनातःगु दुसा लसता चिसंकिपाय् मतिनामिपिनिगु क्वातूगु मतिनायात न्ह्यब्वयातःगु दु । अले लिचिउगु स्वचेतना चिसंकिपाय् फेसबुकय् नेपालभाषायात स्यंका च्वंगु खँयात क्यनातःगु दु । थुकी मेरिना महर्जन व लेजिना महर्जनपिंसं मेनरोल म्हितातःगु दुसा लसता चिसंकिपाय् चिरीबाबु महर्जन व सुस्मी शाहीया मेन रोल दु अले घात चिसंकिपाय् शोभा महर्जनया हे मेन रोल दु ।

नसा
थ्व चिसंकिपाया निर्देशक राजेशमान सिंह खः । “हिसिमदु” व “लिबाय् धुंकाः” थेंज्याःगु संकिपा दयेकेधुंकूम्ह निर्देशकया थ्व चिसंकिपाया बाखं नं निर्देशक थःम्हेसिनं हे च्वःगु खःसा थुकी आराध्यलक्ष्मी खड्गी व रुपेन्द्र श्रेष्ठया मेनरोल दु । छेँय् स्वयेमाःम्ह मिजंनं छेँजःपिंसं गुलि दुःख सीमालि धकाः क्यनातःगु थ्व फिल्मय् छेँया हामां वास्ता मयाबलय् छेँय् मस्तय् नसा ज्वरे मजुइगु बाखं क्यनातःगु दु ।

ध्व छध्वः रेखां किउगु÷आस्था÷ह्याउँगु हि
थ्व स्वंगुलिं चिसंकिपाया निर्देशक योबन शाक्य खः । चिचाधंगु इलय् हे स्वंगू स्वंगू चिसंकिपा दयेकेफुगु धइगु योबन शाक्य व प्रज्वल शाक्यपिनिगु तारिफ यायेबहगु कुतः खः । सरिता बज्राचार्य, प्रबोध कसाः, प्रेमा शाक्य, सुरेन्द्र महर्जन व रणेन्द्र महर्जनया मेनरोल दुगु “ध्व छध्वः रेखां किउगु” चिसंकिपाया बाखं शशीकला मानन्धरया बाखंनय् आधारित खःसा थ्व चिसंकिपाय् छम्ह विधवा मिसाया पीडा व विद्रोहयात न्ह्यब्वयेगु कुतः यानातःगु दु ।

सुरज व्यन्जकार, रोजिना सुवाल व सरस्वति मानन्धरया मेनरोल दुगु “ह्याउँगु हि”या बाखं राज महर्जनं च्वःगु खः । थुकी तःमि–चीमि वा थःजात क्वजात न्ह्याम्हेसिंया हिया रंग ह्याउँगु हे जुइ अले मालिबलय् ज्या वइ धकाः क्यनातःगु दु । “आस्था” चिसंकिपाय् धाःसा नुगलय् दुगु आस्थां ल्वंहयात नं द्यः यानाबीफु धकाः प्रतिकात्मक रुपं क्यनातःगु दु । थुकी सुनं पात्रया म्ह छ्यलातःगु मदु । उमिगु सः अले ल्हाः व पलाःयात प्रयोगात्मक रुपं छ्यलातःगु दु ।

घःचाः
छम्ह मिसा निर्देशक कथं न्ह्यावया च्वंम्ह प्रमिला मानन्धर धइम्ह निर्देशक व कलाकार रामकृष्ण खडगीया तिरीमयजु खः । थ्व सिबें न्हापा “पिया च्वना” नांयागु प्रयोगात्मक चिसंकिपा दयेके धुंकूम्ह प्रमिला मानन्धरया “घःचाः” छुं नं कथं झंगः ल्हाना ध्यबा कमे यायेफत धकाः लय्ताय् मजिउ छाय्धाःसां जीवन धइगु घःचाः खः उकिं चाःहिला थःत हे लिच्वः लायेयः धयागु क्यनातःगु ।

नांजाःम्ह नेवाः स्टार आशिष्मा नकःमिया पाहां भुमिका दूगु थ्व चिसंकिपाय् पात्रया संवादयात तप्यकं न्वमवाकुसे प्रतीकात्मक रुपं जक न्ववाकातःगु दु । थुकी रामकृष्ण खडगी, मोहम्मद इकबाल, बिकेश खडगी, मानिक शाहि, ज्ञानेन्द्र शाक्यपिनिगु मेनरोल दु ।

स्वार्थ
‘‘पटाचारा” संकिपाया निंतिं राष्ट्रिय चलचित्र पुरस्कारय् सर्वोत्कृष्ट निर्देशकया सिरपाया नापनापं थगुने जूगु चिहासंकिपा कासाय् “अस्तित्व” या निंतिं ल्यूसिरपा त्याके धुंकूम्ह रामकृष्ण खडगीया “स्वार्थ” नं मतिनाय् पंगः दंवइगु तःमि–चिमीया बाखंयात न्ह्यब्वयातःगु दु । थुके कृष्णभक्त महर्जन, अन्नपूर्णेश्वरी श्रेष्ठ, अन्जला नकःमि श्रेष्ठ, प्रतीक श्रेष्ठ, उजय शाही व सजना बज्राचार्यया मेन रोल दु ।

कुमति
फिल्म च्वमिया रुपय् म्हसिका दुम्ह शंकर खड्गीया थःगु हे बाखनय् थःम्हेसिनं निर्देशन याःगु थ्व चिसंकिपाय् थः तिरीमय्जुयात न्ह्याब्ले शंकाया दृष्टिं स्वयाच्वनीम्ह छम्ह मिजंया बाखं क्यनातःगु दु । थुकी किशोर कुमार शाही, रोजिना सुवाल, शंकर खडगी, श्यामसुन्दर शिल्पकार, अर्नेश्वरी शिल्पकार, उजय शाहीपिनिगु मेनरोल दु ।

थुकथं दुथ्याःगु झिंखुगू चिसंकिपाय् योबन शाक्यया ‘ध्व छध्वः रेखां किउगु’ न्हाप सिरपा त्याकेत ताःलाःगु दुसा निर्देशक रजिन महर्जनया म्युजियम लिउ अले रामकृष्ण खड्गीया स्वार्थ व दर्शनबीर शाक्यया इन्द्रायणी चिसंकिपां लियांल्यू सिरपाः त्याकेत ताःलाःगु दु ।

सम्बन्धित बुखँ

LEAVE YOUR COMMENTS