रुपज्योतिया मुद्दा सहमतिपाखे

येँ – नांजाःम्ह उद्योगपति डा. रुपज्योतिया जग्गा विवाद सम्बन्धी मुद्दा सहमतिइ वनाः समाधान जुइगु संकेत खने दया वःगु दु । वय्कःयात जग्गा ठगी सम्बन्धी द्वपं बिसें प्रहरी ज्याकुथी उजुरी तःम्ह बिगेन्द्रकृष्ण मल्लं थम्हं तःगु निवेदन लित काःगु कारणं थ्व प्रकरण आः सहमति जुयाः समाधान जुइगु संकेत खने दया वःगु खः ।

निवेदक मल्लं थःपिनि खँ मिले जुइधुंकल धासें म्हीग प्रहरी ज्याकुथी वनाः थःगु उजुरी लित काःगु खः । उकिं थ्व प्रकरणय् निगू पक्षया दथुइ सहमति जूगु संकेत वःगु दु । थःके ध्यबा कयाः नं अपार्टमेन्ट दयेकाः लःमल्हाःगु कारणं थःत ठगे यात धासें मल्लं तःगु उजुरीया आधारय् भाजु ज्योतियात ज्वंगु खः ।

वय्कःयात ज्वनेगु थ्व ज्याया लिउने तःधंगु राजनीतिक शक्तिया नं ल्हाः दुगु आशंका याःगु दु । थ्वहे झ्वलय् समाजवादी नेवाः संघं उद्योगपति डा. रुपज्योतियात प्रहरीं ज्वनाः हिरासतय् तःगु खँयात कयाः विरोध याःगु दु । संघपाखें म्हीग छगू वक्तव्य पितबिसें स्वनिगःया नेवाःतय् भाषा, संस्कृति, भाषा लिपियात मदयेकेगु कुतः जुयाच्वंगु जक मखु आः वयाः नेवाः उद्यमीतय्त नं मदयेकेगु षडयन्त्र जुयाच्वंगु खँ धाःगुद ु ।

राज्यया थज्याःगु रवैयाया भत्सर्ना यासें वक्तव्यय् डा. रुपज्योतियात बिनाशर्त त्वःतेमाःगु माग नं यानातःगु दु । संघया नायः सत्यनारायण डंगोल व मूछ्यांज्ये सुरेश खड्गीं हस्ताक्षर याना तःगु विज्ञप्तिइ नेवाः जातियात गुगुं नं क्षेत्रय् मदयेका छ्वयेगु षडयन्त्र राज्यपाखें हे न्ह्यःने हयाच्वंगु दु धासें राज्यया थज्याःगु ज्यायात कयाः नेवाः संघं माःकथं प्रतिवाद यायेमालीगु ख्याच्वः नं बियातःगु दु । वय्कःयात ज्वंगु विरोधय् म्हिगः नेउवा संघं येँय् छगू ¥याली नं पिदंगु दु ।