किपुली चौपक्षीय धेंधेंबल्लाः

किपू (नेपालभाषा टाइम्स)- किपुली जुइत्यंगु मेयर पदया निर्वाचनय् प्यंगू पक्षीय धेंधेंबल्लाः जुइगु खनेदु । स्थानीय तह उपनिर्वाचनया झ्वलय् जुइत्यंगु मेयर पदया चुनावया निंतिं गुंगू दल व झिंछम्हेसिनं स्वतन्त्र उम्मेदवारी बियातःगु दु । थुकी मध्ये एमाले, कांग्रेस, माओवादी व स्वतन्त्रपाखें राजमान महर्जन दथुइ तच्वःगु धेंधेंबल्लाः जुइगु खनेदुगु खः ।

थुगुसी एमाले, कांग्रेस व माओवादी स्वंगुलिं पार्टीं बल्लाःपिं उम्मेदवार थनातःगु दु । एमालें संविधानविद् डा. सुरेन्द्र मानन्धर थंगु दुसा कांग्रेसं शिक्षासेवी कृष्णमान डंगोलयात उम्मेदवारी बिउगु दु । अथेहे माओवादी केन्द्रं प्रा.डा. शिवशरण महर्जनं उम्मेदवारी बियाच्वंगु दु । थ्वहे १६ गते जुइगु चुनावय् मूख्य रुपं थ्वहे स्वम्हेसिया दथुइ धेंधेंबल्लाः जुइगु धाःसां उमित स्वतन्त्रपाखें उम्मेदवारी बियाच्वंम्ह राजमान महर्जनं नं टक्कर बीगु स्थानीयतय् अनुमान दु । सफाइ अभियन्ताकथं म्हसीका दुम्ह महर्जन किपू लहनाया अध्यक्ष नं खः ।

एमालेया उम्मेदवार मानन्धर मचांनिसें कम्युनिष्ट राजनीतिइ संलग्न जुया वयाच्वंम्ह खः । निक्वःगु संविधान सभाया चुनावय् नं उम्मेदवारी बीधुंकूम्ह वय्कः उबलय् पराजित जूसां किपुली धाःसा सकसिनं म्हसिउगु नां खः । भाषा आन्दोलन, साहित्य संस्कृतिया ख्यलय् नं न्ह्यःने खनेदइम्ह जूगुलिं वय्कःयात किपुली यक्वसिनं म्हसिउ । थ्वहे वय्कःया छगू बल्लाःगु पक्ष जुयाच्वंगु दु । अथेहे किपू न्हापांनिसें एमालेया हे गढ जुयाच्वंगु थाय् खः ।

२०७९ सालया स्थानीय चुनावय् एमाले नेतृत्वं स्थानीय एमालेया नेतातय्त बेवास्ता यानाः केशरत्न शाक्ययात उम्मेदवार दयेकूगु खः । उबलय् छगू कथं एमालेय् विद्रोह जूगुलिं जक एमालें पराजय फयेमाःगु खः । आः एमालेयात एकजुट यानायंकेफत धाःसा मानन्धर त्याइगु सम्भावना यक्व दुगु खँ स्थानीयतय्सं धयाच्वंगु दु । अथे खःसां स्वतन्त्रं उम्मेदवारी बिउम्ह राजमान महर्जन न्हापा एमालेयाम्ह हे जूगुलिं वय्कलं मानन्धरया भोट काटे याइगु नं अनुमान दु । थ्वहे दथुइ एमाले नगर सभापति जुइधुंकूम्ह लक्ष्मीकुमार महर्जन थेंज्याःपिं छुं एमालेया स्थानीय सशक्त नेतात सीदयेक हे राजमानया पक्षय् वनाच्वंगु नं दु ।

कांग्रेसपाखें उम्मेदवारी बियादीम्ह डंगोल नं किपुली म्हसिउगु हे नां खः । स्कुल चायेकाः शिक्षा ख्यलय् ज्या याना वयाच्वनादीम्ह वय्कः किपुली स्वास्थ्य ख्यलय् नं सक्रियम्ह खः । अथेहे किपुली जुइगु सांस्कृतिक ज्याझ्वलय् नं यक्व खने दइम्ह जूगुलिं वय्कःयात किपुली अप्वःसिनं म्हसिउ । थौंकन्हय् कांग्रेसया किपू नगर सभापति नं जुयाच्वनादीम्ह वय्कःयात थुगुसी दकलय् लबः दुगु खँ धयागु किपूया झिगू वडा मध्ये च्यागुली कांग्रेसं त्याकातःगु दु । निदँत्या न्ह्यवंनिसें वडामार्फत कांग्रेसत जनताय् दुहां वनाच्वंगुलिं वय्कःयात थुगुसी सहज जुइगु अनमान जुयाच्वंगु दु ।

अथेहे माओवादीपाखें उम्मेदवारी बियादीम्ह प्रा.डा. महर्जन ०७९ या चुनावय् मेयरय् हे पराजित जूम्ह खः । उबलय् स्वंगूगु थासय् लाःम्ह वय्कलं ४०९० मत काःगु खः । थुगुसी वय्कःयात एकीकृत समाजवादी व जसपां नं साथ बियाच्वंगु दु । वय्कःयात अप्रत्यक्ष रुपं रास्वपाया नं साथ दु धाइ । माओवादीया सरकारय् रास्वपाया सभापति रवि लामिछाने गृहमन्त्री जूगु खःसा आः लामिछानेयात ज्वनातःगु इलय् नं माओवादीं साथ बियाच्वंगुलिं रास्वपां किपुली माओवादीयात साथ बीगु अनुमान दु । थ्व ल्याखं महर्जनं न्हापा स्वयां अप्वः मत कायेफइगु अनुमान दु ।

स्वतन्त्रपाखे झिंछम्हेसिनं उम्मेदवारी बिउसां दकलय् अप्वः चर्चा दुम्ह धाःसा राजमान महर्जन हे जुयाच्वंगु दु । धरान उपमहानगरपालिकाया मेयर हर्क साम्पाङ धरानंनिसें किपुली वयाः वय्कःया पक्षय् मत फ्वं वयेधुंकूगु दु । वय्कः थः हे नं जनताय् भ्यलेपुंम्ह जूगुलिं वय्कलं नं न्ह्यथनेबहःगु मत काइगु अनुमान किपुली दु । वय्कलं येँ महानगरपालिकाया मेयर बालेन साह व रास्वपां नं साथ बीगु आशा यानाच्वंगु दु । तर बालेन व रास्वपां साथ बिल धाःसा झन घाटा जक जुइगु खँ नं वयाच्वंगु दु । स्वतन्त्रया लहर वःगु इलय् त्याना वःपिं बालेन व हर्क साम्पाङ थौंकन्हय् धमाधम अराजक जुयाः पिहां वयाच्वंगु दु, मेखे लामिछाने थः हे ठगी मुद्दाय् जेलय् लानाच्वंगु दु । थ्व अवस्थाय् किपूया जनतां स्वतन्त्रयात साथ मबीफु । उकिसनं स्वतन्त्रं उम्मेदवार बिउपिं हे झिंछम्ह दुगुलिं स्वतन्त्रतय् दथुइ हे भोट छरे जुयाः घाटा जुइफु । अथे खःसां चुनाव न्ह्यः तक महर्जनं नं स्वंगू प्रमुख पार्टीयात धाःसा टक्कर हे बियाच्वंगु खनेदु ।