विद्युत प्राधिकरणं चार्जिङ स्टेशन दयेकीगु

विद्युतीय सवारी साधन प्रवद्र्धन

येँ – सर्वसाधारणयात विद्युतीय सवारी साधनय् आकर्षित यायेगु निंतिं नेपाल विद्युत प्राधिकरणं विद्युतीय सवारी साधनया ब्याट्रि चार्ज यायेगु निंतिं देय्न्यंकं थाय्थासय् चार्जिंग स्टेशन दयेकीगु जूगु दु । थुकिया निंतिं प्राधिकरण प्रक्रिया सुरु यायेधुंकूगु खँ धाःगु दु । प्राधिकरण सुरुइ स्वनिगलय् निं थीथी थासय् थज्याःगु स्टेशन तयेत्यंगु खँ प्राधिकरण कार्यकारि निर्देशक कुलमान घिसिंगं धयादीगु दु ।

वंगु शुक्रवाः नेपाल इन्जिनियर्स एशोसियसनं याःगु छगू अन्तरसंवाद ज्याझ्वलय् न्ववानादिसें कार्यकारि निर्देशक घिसिंगं स्वनिगलय् छुं छुं थासय् थज्याःगु स्टेशन तयाः सुरुवात यायेगु खँ धयादीगु खः । छुं न्हि न्ह्यव प्रधानमन्त्री केपी शर्मा ओलीं नं साझा यातायातं हःगु विद्युत बसया उलेज्या यायेगु झ्वलय् स्वनिगलय् नीगू थासय् चार्जिंग स्टेशन तयेगु घोषणा यानादीगु खः ।

कार्यकारि निर्देशक घिसिंग चार्जिंग स्टेशन तयेगु निंतिं खास हे समस्या मदुगु खँ धयादिसें तर गुलि शुल्क कायेगु, गुकथं शुल्क कायेगु व गुलि क्षमताया स्टेशन दयेकेगु धयागु बारे धाःसा नीतिगत व्यवस्था याये ल्यंदनिगु खँ धयादीगु दु । थुकिया बारे ऊर्जा मन्त्रालयय् सहलह जुयाच्वंगु खँ नं वय्कलं धयादीगु खः ।

लिसें वय्कलं पेट्रोल पम्प तयेबलय् थें राजमार्गया हरेक ३०–३० किलोमिटर दुने थज्याःगु चार्जिंग स्टेशन तयेमाःगु व स्वनिगलय् नं सहज रुपं चार्ज याये फइ कथं स्टेशन दयेकेमाःगु बिचाः प्वंकादीगु दु । छगः बस चार्ज यायेगु निंतिं म्होतिं नं ८० किलोवाटर बराबरया मत आवश्यक जुइ । कार्यकारि निर्देशक घिसिंगं कानुनी प्रावधान वयेवं स्टेशन दयेकेगु ज्या सुरु जुइ धयादीगु दु ।

प्राधिकरणया केन्द्रीय ज्याकू रत्नपार्क व एनइए इन्जिनियरिंग कम्पनीया ज्याकू थापाथली धाःसा थज्याःगु चार्जिंग स्टेशन दयेकेधुंकूगु दु । चार्जिंग स्टेशन थाय्थासय् तयेफत धाःसा विद्युतीय सवारी साधनपाखे मनूत आकर्षण अप्वइगु विश्वास यानातःगु दु ।

पेट्रोलियम पदार्थय् यक्व ध्यबा खर्च जुइगु व वातावरण नं स्यंकीगु जूगुलिं थौंकन्हय् विश्वन्यंकं विद्युतीय सवारी साधनया माग अप्वया वनाच्वंगु दु । थ्व हे कथं नेपालय् नं मतं चले जुइगु थज्याःगु सवारी साधनय् सर्वसाधारणया ध्यान वनाच्वंगु दुसां सरकारं धाःसा आवश्यक नीतिगत निर्णय मयाःनिगुलिं थज्याःगु सवारी साधन सहज रुपं दुहां वयेफयाच्वंगु मदुनि ।

सम्बन्धित बुखँ

LEAVE YOUR COMMENTS