ने. सं. ११४६ अनलाथ्व पुन्हि -

धौलागिरिइ साहसिक पर्यमार्गया विकास

येँ – म्याग्दीया धौलागिरी गाउँपालिका ४ मुदीइ लाःगु संसारया हे न्हय्गूगु तःधंगु हिमाल धौलागिरी (८१६७ मि)या आधार शिविर वनेगु पदमार्ग नं साहसिक पदयात्राया रुपय् विकास जुयावःगु दु । तजाःगु पहाड व हिमाल क्वंक्वं वनेगु कथं दयेकूगु पदमार्गय् हिमाल आरोहण, धौलागिरी हिमाल चाःहिलेगु व आधार शिविर तक पदयात्राय् वनीपिं पर्यटकत आकर्षित जुयावःगु दु ।

छुं दँ न्ह्यव तक म्हो जक विदेशी पर्यटकत भ्रमणय् वइगु थ्व पदमार्गय् लिपांगु इलय् विदेशी लिसे आन्तरिक पर्यटकत नं अप्वया वःगु खँ इटाली आधार शिविरय् होटल व्यवसाय याना वयाच्वनादीम्ह हरिप्रसा तिलिजां धयादिल । ‘ताःहाकः यात्रा यायेमाःगु जूगुलिं थ्व क्षेत्रय् विदेशी पर्यटकतय् जक वयगु यानाच्वंगु खः, लिपांगु इलय् नेपाली पर्यटकत नं वयेगु सुरु जूगु दु ।

पदमार्ग, झोलुङ्गे ताँ लगायतया पूर्वाधार दयेकेवं पदयात्राय् वइपिं पर्यटकतय्त नं राहत चूलाःगु दु’ वय्कलं धयादिल । धौलागिरी पदमार्गय् पूर्वाधार दयेका हयेवं ज्यानया जोखिम तयाः भीर भीर जुयाः न्यासि वनेमाःगु बाध्यता बुलुहुं मदया वंगुलिं पदयात्रा नं सुरक्षित जुयावःगु दु ।

मोहनीया बिदाया इलय् छवाः ताःहाकःगु पदयात्रा यानाः धौलागिरी आधार शिविर थ्यंकःवःम्ह धौलागिरी गाउँपालिका ४ खाम्लाया केसरीं शर्मां पर्यटन विकासया निंतिं तःधंगु सम्भावना दुसां थ्व क्षेत्र प्रचार प्रसार म्हो जूगुलिं लिउने लानाच्वंगु खँ कनादिल ।

‘धौलागिरी पदमार्ग साहसिक पर्यटनया सम्भावनायुक्त क्षेत्र खः, थुकिया प्रचारप्रसार व अत्यावश्यक पदमार्गलगायतया पूर्वाधार दयेकेगुपाखे सम्बन्धित निकायया ध्यान वनेमाः’ म्याग्देली विद्यार्थी परिवार काठमाडौंया अध्यक्ष नं जुयाच्वनादीम्ह शर्मां धयादिल ।

पदमार्ग अन्तर्गत नाउराया भीर, इटाली क्याम्प निसें स्विस क्याम्प वनेगु पदमार्ग व जापानी क्याम्प निसें अधार शिविरतकया ग्लेसियर क्षेत्रया पदयात्रा अजू चायापुगु व साहसिक जूगु खँ वय्कलं धयादिल । लिपांगु इलय् पदमार्ग अन्तर्गत दकलय् जोखिमयुक्त जुयाच्वंगु नाउराया भीर निसें बगर, दोभान, सल्लाघारी, इटाली बेस क्याम्प जुयाः स्वीस क्याम्प तकया पदमार्गयात स्तरोन्नति यायेधुंकूगु दु ।

गण्डकी प्रदेश व संघीय सरकारपाखें चूलाःगु ६५ लाख तका बजेटपाखें १२ किलोमिटर पदमार्ग दयेकेगु व मर्मत यायेगु ज्या जूगु दु । भीर व जंगलया जोखिमपूर्ण पदमार्गयात तब्या यानाः पूर्वाधार निर्माण यानागु खँ गाउँपालिकाया अध्यक्ष थमसरा पुनं कनादिल । वय्कलं अझ नं मछिंगु थासय् पदमार्ग दयेकेगु व खुसिइ झोलुङ्ग ताँ तयेगु निंतिं पहल जुयाच्वंगु खँ कनादिल ।

पदमार्ग निर्माणलिसें धौलागिरी आधार शिविर व चक्रीय धौलागिरी व हिमाल आरोहणया निंतिं वनीपिं पर्यटकतय्त राहत जूगु दु । जोखिमपूर्ण पदमार्ग व संचारया पहुँच मदुगु कारणं आधार शिविर वनेगु निंतिं पर्यटकतय्सं हेलिकप्टर छ्यला वयाच्वंगु खः ।

आरोहणय् वनीपिं फुक्क धयाथें पर्यटकत हेलिकप्टर गयाः वनीगु जूसां धौलागिरि चाःहिलेगु व आधार शिविर वनीपिं पर्यटकत धाःसा पदमार्ग जुयाः वयेवनेगु याइ ।

धौलागिरि पदमार्गय् न्ह्यइपुगु हिमश्रृ्रङ्खला लिसें ततजाःगु झरना, जंगलया एकान्त वातावरण, लिक्कसं खनेदइगु झारल, कस्तुरी मृग, डाँफे, ताल, हिमनदीया दृष्य पदयात्राया मू आकर्षण जुयाच्वंगु दु । ग्लेसियर क्षेत्रय् लाःगु हिमताल नं पर्यटकतय् निंतिं आकर्षक जुयाच्वंगु दु ।