म्याद फुगु सामान मिउपिं पसः थुवाःतय्त ज्वन

येँ – म्याद फूगु सामान मिउगु व व्यवसाय दर्ता मयासे पसःया सञ्चालन याःगु धासें स्वयम्भूया छगू पसः थुवाःयात ज्वंगु दु । म्हिगः येँया स्वय्म्भुइ च्वंगु पिलग्रिम ग्रोसरया सञ्चालकयात ज्वंगु खः । छुं न्हिं न्ह्यवंनिसें वाणिज्य, आपूर्ति तथा उपभोक्ता हित संरक्षण विभागं बजारय् म्याद फूगु व अखाद्य वस्तु मियाच्वंगु धासें अनुगमन सुरु याःगु खः ।

थ्व झ्वलय् विभागं आः तकया दुने झिम्ह व्यापारीयात ज्वनाः कारबाही प्रक्रिया न्ह्याकेधुंकूगु दु । वंगु बुधवाः न्हय्म्ह व बिहीवाः निम्ह व्यापारीयात ज्वंगु खः । विभागं खुद्रा व्यापारीया लिसें नांजाःगु भाटभटेनी सुपर मार्केटयात नं कारबाही यायेधुंकूगु दु । अनुगमनया झ्वलय् स्वयम्भूया पिलग्रिम ग्रोसर, चाबहीया जय भोले ट्रेडर्स, उगु हे थाय्या एकता मार्केटिङ व होप मार्टय् सिलबन्दी याःगु दु ।

उगु पसलय् मूल्य सूची तयामतःगु, तःधंगु परिमाणय् म्याद फुइधुंकूगु खाद्य सामाग्री मियाच्वंगु, लेभल मदुगु सामान तयातःगु लूगुलिं पसः सिलबन्दी यानागु खँ विभागं धाःगु दु । लिसें अनुगमनया यायेगु झ्वलय् लूगु म्याद फुइधुंकूगु व लेबल मदुगु सामाग्री नष्ट याःगु दु ।

विभागं येँ व यलय् यानाः झिंप्यंगू खुद्रा व थोक व्यापारीया पसः अनुगमन यायेधुंकूगु दु । मेगु थीथी पसःयात नं माःगु निर्देशन बियागु खँ विभागं धाःगु दु । विभागं दँय्दसं थथे अनुमान यायेगु ज्या याःसां फुक्क थासय् बांलाक अनुगमन यायेमफुगुलिं उपभोक्ता ठगे जुइमालाच्वंगु दु ।