दाहाल-नेपाल पुचःया देशव्यापी आन्दोलन : ‘गल्ती भिंकूसा वार्ता यायेत तयार’

येँ (नेपालभाषा टाइम्स) – नेकपा दाहाल-नेपाल पुचलं प्रधानमन्त्री केपी ओलीं याःगु संसद विघटनया विरुद्ध म्हिगः देय्न्यंकं प्रदर्शन यात । थ्व झ्वलय् म्हिगः येँया भृकुटी मण्डपय् तःजिगु सभा याःगु दु ।

सभाय् न्ववासें नेकपाया अध्यक्ष दाहालं सर्वोच्च अदालतपाखें संसद पुनर्स्थापना याइगु खँय् थः आशावादी जुयागु बिचाः प्वंकादिल । वय्कलं धयादिल, ‘जिं सोचे नं याये फयाच्वगु मदु कि अदालतं संविधानया मर्म व भावना थुइकी मखु । कानुनविद् तय्सं धया वयाच्वंगु बिचाःया अःखः अदालत वनी धकाः जिं कल्पना नं मयाना ।’

आः न्ह्यानाच्वंगु आन्दोलनं अदालतयात फैसला यायेत अझ अःपुइ धासें वय्कलं धयादिल, ‘देय्न्यंकं न्ह्यानाच्वंगु प्रदर्शनयात सही फैसलाया लागिं जनतां याःगु सहजीकरणया रुपय् थुइकेत इनाप याना ।’

थ्व विरोध प्रदर्शन प्रतिनिधिसभा विघटनया पलाः मभिंकूतले जारी जुइ धासें वय्कलं धयादिल, ‘निम्ह मनू जायेवं सदनयात बिउगु जनताया सार्वभौम अधिकार न्हुइगु व सदनया हत्या याये फइ मखु, उकिया निंतिं माल धाःसा कठोर आन्दोलन यायेगु जुइ ।’

मेम्ह अध्यक्ष माधव नेपालं  पार्टी विभाजनया निंतिं प्रम ओलीं वंगु दछि न्ह्यवंनिसें षडयन्त्र याना वयाच्वंगु खँ धासें पार्टीयात छले यानाः प्रतिनिधिसभा विघटन यायेगु पलाः ल्ह्वंगु द्वपं बियादिल । वय्कलं प्रधानमन्त्री प्रतिनिधिसभा पुनर्स्थापना यायेत न्ह्याः वल धाःसा वार्ताय् च्वनेत थःपिं तयार जूगु खँ नं धयादिल । वय्कलं प्रम ओलीयात सच्चे जुइगु थ्व लिपांगु मौका खः धासें पार्टी अनुशासनया उल्लंघन यासें स्वेच्छाचारी पलाः ल्ह्वनेधुंकाः अध्यक्ष पदं चीकूसां नं केन्द्रीय दुजः व पार्टी सदस्यपाखे चीकूगु मदुनि उकिं वय्कःयात अन्तिम मौका बियागु दु धयादिल ।

उकथं हे पार्टीया मेम्ह नेता झलनाथ खनालं प्रम ओलीं संविधान हाचां गायाः तानाशाही पलाः छिउगुलिं थःपिं सतकय् वयेत बाध्य जूगु खः धयादिल । वय्कलं आन्दोलनया धाकुफय् हयाः संविधानया रक्षा यायेत व देय्यात अस्थिरतापाखें बचे यायेत नं सकसितं आह्वान यानादिल ।

नेकपा विभाजनया अवस्था मवयेकेत चिनियाँ कम्युनिष्ट पार्टीया प्रतिनिधि मण्डल नेपाः वयाः निगुलिं पुचःया नेतातय्त नापलानाः यानाच्वंगु खँल्हाबल्हा बारे धाःसा सुं नं नेतां अन जानकारी मबिल ।

सम्बन्धित बुखँ

LEAVE YOUR COMMENTS